Fota pixabay.com.
Pieršyja vyprabavańni novaha mietadu prafiłaktyki lichamanki denhie prajšli ŭ indaniezijskim horadzie Džakjakarta, ale paźniej hieahrafiju testavańnia pašyryli, spadziejučysia pieramahčy virus na bolšaj kolkaści terytoryj. Sutnaść technałohii — inficyravańnie maskitaŭ bakteryjami pad nazvaj Valbachii, piša VVS. Jajki maskitaŭ źmiaščali ŭ viodry z vadoj i bakteryjami kožnyja dva tydni. Urešcie praces stvareńnia zaražanaj bakteryjami papulacyi maskitaŭ zaniaŭ dzieviać miesiacaŭ.
Hetyja bakteryi nie škodziać nasiakomym, ale jany raźmiaščajucca ŭ tych ža častkach cieła maskita, kudy pavinny praniknuć virus denhie. Bakteryi zmahajucca za resursy i praz heta ŭskładniajuć dla virusa mahčymaść razmnažacca. Tamu źnižajecca vierahodnaść taho, što pry ŭkusie chvoraha čałavieka taki maskit stanie pieranosčykam lichamanki denhie.
Padčas vyprabavańniaŭ u Džakjakarcie maskity, inficyravanyja bakteryjami, byli vypuščanyja ŭ pałovie rajonaŭ horada. Vyniki pakazali, što lačeńnie źniziła na 77% kolkaść vypadkaŭ lichamanki denhie. Taksama na 86% pamienšała kolkaść tych vypadkaŭ chvaroby, padčas jakich patrebna špitalizacyja.
50 hod tamu mała chto čuŭ pra hetuju chvarobu, ale z taho času kolkaść vypadkaŭ lichamanki denhie darasła da ŭzroŭniu biaźlitasnaj pandemii. U 1970 hodzie tolki ŭ dzieviaci krainach śvietu zdaralisia mocnyja ŭspyški chvaroby, ale ciapier ich kolkaść u Azii i Paŭdniovaj Amierycy dasiahnuła 400 miljonaŭ za hod. Adzin ź viadomych simptomaŭ lichamanki denhie — bol u muskułach i kostkach, a ŭspyški chvaroby byvajuć nastolki mocnyja, što vyklikajuć pierapaŭnieńni špitalaŭ.
