Złačyncy, što ździejśnili napad na miascovaje adździaleńnie «Biełarusbanka» ŭ miastečku Kopć Viciebskaha rajona, zatrymanyja.
7 lipienia dvoje nieviadomych u maskach abrabavali kasu na 10 miljonaŭ biełaruskich rubloŭ, 20 tysiač rasijskich, kala paŭtary tysiačy dalaraŭ i tysiaču jeŭra. Pry hetym byli naniesienyja ciažkija cialesnyja paškodžańni kasiru.
Jak paviedamlaje ŭpraŭleńnie infarmacyi i hramadskich suviaziaŭ MUS, zatrymać złačyncaŭ «pa haračych śladach» nie atrymałasia. Padčas dalejšych pošukavych mierapryjemstavaŭ udałosia ustanavić, što ŭ traŭni i červieni dvoje padobnych pa prykmietach hramadzian naviedvali miascovaje adździaleńnie «Biełarusbanka» ŭ vioscy Krynki. U piersanała i naviedvalnikaŭ ich pavodziny vyklikali padazreńni.
Adnačasova va Upraŭleńnie pa baraćbie z arhanizavanaj złačynnaściu Viciebskaj vobłaści pastupili źviestki pra mažlivaje dačynieńnie da ździejśnienaha złačynstva 25‑hadovaha žychara Viciebskaha rajona. Kasir i śviedki napadu apaznali jaho pa zdymkach. Paśla pradjaŭleńnia dokazaŭ, jon pryznaŭsia ŭ dačynieńni da kradziažu i ŭkazaŭ na saŭdzielnika, jaki taksama zaraz źmieščany ŭ śledčy izalatar.
Admietny toj fakt, što zatrymanyja nie źjaŭlajucca biednymi ludźmi: adzin ź ich kiruje stancyjaj techničnaha absłuhoŭvańnia ŭ Viciebsku, druhi — indyvidualny pradprymalnik.
Jak paviedamili ŭ pres‑słužbie MUS, isnuje vialikaja vierahodnaść taho, što hetyja ludzi datyčnyja da inšych złačynstvaŭ. Zaraz pa hetym fakcie pravodzicca pravierka.
