Padziemny pierachod na prypynku «Druhoje kalco» byŭ całkam pad vadoj.
Liŭnievaj kanalizacyjaj Minska zojmiecca Administracyja prezidenta. «Pryniata rašeńnie ab kompleksnym abśledavańni ŭsioj liŭnievaj sistemy horada Minska»,— paviedamiŭ u efiry Pieršaha kanała 24 lipienia pamočnik prezidenta — hałoŭny inśpiektar pa Minsku Anatol Kalinin.
Pavodle jaho słoŭ, zaprošany niezaležnyja ekśpierty. «Praviadziem manitorynh i zrobim zachady dla taho, kab minimizavać prablemy z padtapleńniem u horadzie Minsku», — zajaviŭ Kalinin.
U vyniku mocnaj zalevy dniom 24 lipienia ŭ Minsku (rajon absiervatoryi) vypała 56 mm apadkaŭ, što składaje amal 62% miesiačnaj normy, a ŭ rajonie aeraporta «Minsk‑1» — 77 mm (85%), paviedamili BiełaPAN u Respublikanskim hidramieteacentry. Zafiksavany taksama hrad dyjamietram 1 sm.
Pavodle infarmacyi pres‑sakratara MNS Vitala Navickaha, u stalicy było padtoplena bolš za 50 učastkaŭ vulična‑darožnaj sietki, što pryviało da spynieńnia ruchu transpartu. Niekatory čas nie pracavali stancyi mietro «Park Čeluskincaŭ» i «Uschod».
Vyratavalniki adpampoŭvali vadu z budynkaŭ pieršaj i treciaj haradskich kliničnych balnic, kaścioła Śviatych Symona i Aleny na płoščy Niezaležnaści, univiersama «Rubloŭski» na Niamizie.Było zatoplena mnostva raźmieščanych u cokalnych pavierchach u hetym rajonie kafe, majsterniaŭ i kvater. Poŭnaściu apynuŭsia pad vadoj padziemny pierachod na 2‑m kalcy. Kolkaść paciarpiełych ad vady aŭtamabilaŭ naličvajecca sotniami.
U likvidacyi nastupstvaŭ stychii ŭdzielničała 42 adzinki techniki i kala 200 supracoŭnikaŭ MNS, jakoje było pieraviedziena na ŭzmocnieny varyjant niasieńnia słužby. Napiaredadni ŭ centr horada była pieradysłacyravana vadałaznaja vyratavalnaja słužba. Z zon zatapleńnia vyratavana i evakuavana bolš za 300 čałaviek.