Adzin łoŭki małady čałaviek, kursujučy miž Polščaj i Biełaruśsiu, naładziŭ vyhadny biznes. Jon prapanoŭvaŭ moładzi za ennuju sumu hrošaj vyrabić… vartyja rekamendacyi dla atrymańnia stypendyi Kalinoŭskaha ŭ Polščy. I klijenty znachodzilisia. Bo što takoje para dziasiatkaŭ dalaraŭ, kali ty zdaŭ u Biełarusi testy na 30 bałaŭ, a vučycca chočacca.
Aktyvisty Prahramy Kalinoŭskaha ŭ Polščy vyjavili machlara, zmusili pakajacca i źviarnulisia ŭ Redakcyju z prośbaj ahučyć jahonaje imia. Nia budziem taho rabić. Damo šaniec vypravicca jašče zusim maładomu čałavieku.
Vyjezd studentaŭ na vučobu ŭ zamiežnyja ŭniversytety nabyŭ nastolki masavy maštab, što kranaje roznyja pytańni — jak etyčnyja, tak i palityčnyja.
«Ludzi, što mahli prynosić karyść, raźjechalisia ź Biełarusi», — z horyčču kaža Artur Fińkievič karespandentam «NN», jakija naviedali jaho na «chimii». Jon pryvodzić prykład Barysa Hareckaha, byłoha pres-sakratara «Maładoha frontu». «Ale Hareckaha jašče možna zrazumieć — jaho chacieli «zakryć» pa kryminałcy. Kiepska, što siarod stypendyjataŭ prahramy imia Kalinoŭskaha šmat ludziej, jakim zusim ničoha nie pahražała», — miarkuje palitviazień.
Fond — adna z samych jarkich idejaŭ apošniaha času — uźnik z žadańnia salidarnaści. Ź idei dać eŭrapiejskuju adukacyju budučaj biełaruskaj intelihiencyi. Pa ŭzorach dziejnaści polskaha nacyjanalnaha ruchu 80-ch. Adroźnieńnie 2000-ch ad 1980-ch, a Biełarusi ad Polščy ŭ tym, što śviet hlabalizavany, a nacyjanalnaja ŭkarenienaść mnohich biełarusaŭ nizkaja. Adsiul i niepakoj: ci spracuje ŭ nas schiema, što apraŭdała siabie ŭ Polščy? Ci nia stanuć stypendyi kanałam adtoku mazhoŭ? Čaho bolš ad dziejnaści Fondu — karyści ci škody?
Na hetaje pytańnie adkaža tolki čas. Ale hety adkaz zaležyć ad supracoŭnikaŭ Fondu. Ich dziejnaść historyja acenić pa tym, jaki pracent stypendyjataŭ Fondu budzie viartacca ŭ Biełaruś. Hety adsotak, u svaju čarhu, zaležyć ad kryteraŭ adboru. I kali na stypendyi ŭ pahoni za kolkaściu buduć traplać studenty, jakim na Biełarusi nie zaležyć, jakim jana fijaletavaja, kažučy paprostu, jakija nia majuć namieru viartacca na radzimu paśla navučańnia, tady vynik dziejnaści Fondu budzie mizernym.
Apisanaja vyšej sytuacyja z maładym čałaviekam — pieršy tryvožny zvanočak. Treba pilnaść. Bo tolki-tolki ŭ Fond Kalinoŭskaha praniknuć karupcyja i kumaŭstvo, tolki-tolki «most salidarnaści» ŭ siabroŭskija krainy buduć vykarystoŭvać amatary vysokich spažyvieckich standartaŭ, nie zaroblenych ułasnym mazalom, heta stanie nia prosta škodaj, a prysudam Fondu.
«NN» budzie adsočvać sytuacyju z vyjezdam aktyvistaŭ nacyjanalnaha ruchu na vučobu za miažu. A maładyja ludzi niachaj dumajuć…
