U 2021 hodzie ŭ Biełarusi zarehistravana 3409 machlarstvaŭ, ź jakich bolš jak 2 tysiačy ździejśnienyja z vykarystańniem infarmacyjna-kamunikacyjnych technałohij. Ahulny ŭron tolki fizičnym asobam skłaŭ bolš za 400 tysiač rubloŭ.
Standartnaja schiema nastupnaja: machlary pradstaŭlajucca supracoŭnikami banka i pad roznymi nahodami pierakonvajuć aformić kredyt i pieraličyć srodki na peŭny rachunak.
«Bankiry» kažuć achviary machlarstva, što nibyta chtości ad jaho imia sprabuje aformić u banku kredyt. Čałavieku prapanujuć pryniać kanfidencyjny ŭdzieł u vykryćci ašukancaŭ, dla hetaha treba aformić realny kredytny dahavor (jak praviła, u niekalkich bankach) i pieraličyć srodki na peŭny rachunak nibyta dla zabieśpiačeńnia ich zachavanaści.
Adnačasova hramadzianina zapeŭnivajuć, što pahašać uziaty kredyt nie treba.
Złamyśniki prosiać nie pieratelefanoŭvać u bank i nie praviarać źviestki, bo heta moža naškodzić «rasśledavańniu», papiaredžvajučy pry hetym ab kryminalnaj adkaznaści za razhałošvańnie źviestak.
Nacbank rekamienduje inšym bankam pierad afarmleńniem i vydačaj kredytu fizasobie pravodzić padrabiazny analiz kredytnaj spravazdačy, atrymanaj u Kredytnym rehistry, na pradmiet zapytaŭ inšych bankaŭ da kredytnaj historyi taho ž čałavieka.
