Toj samy fotazdymak, na jakim u rukach u amapaŭca zaŭvažyli pistalet. U stojcy ŭ cyvilnym la busa — amapaviec Vital Duk
Siarhiej Niepahoda — treci asudžany fihurant spravy za patasoŭku ź siłavikami 19 červienia minułaha hodu ŭ Maładziečnie paśla akcyi salidarnaści, kali pratestoŭcy adbivali zatrymanaha, a amapaviec dastaŭ pistalet.
Paŭła Piaskova i Uładzisłava Jeŭścihniejeva asudzili da 3 hadoŭ kałonii jašče naprykancy vieraśnia 2020 hoda. Siarhiej Niepahoda byŭ pryznany padazravanym, ale źjechaŭ za miažu i ŭ sudzie nie ŭdzielničaŭ. Jaho zatrymali 17 sakavika ŭ Sankt-Pieciarburhu, źmiaścili ŭ rasijskaje SIZA na paŭhoda, a kali skončyŭsia termin utrymańnia pad vartaj, to pa pryčynie parušeńnia mihracyjnaha režymu vypravadzili ŭ Biełaruś. Tut jaho źmiaścili pad vartu na padstavie zaviedzienaj suprać jaho kryminalnaj spravy.
Što adbyłosia 19 červienia 2020 hoda
19 červienia 2020 hoda, u apošni dzień pikietaŭ pa zbory podpisaŭ za vyłučeńnie kandydataŭ u prezidenty, u mnohich haradach Biełarusi prajšli akcyi salidarnaści z alternatyŭnymi kandydatami. Takaja akcyja prajšła i ŭ Maładziečnie. Kala dziesiaci hadzin viečara na skryžavańni vulic Bahdana Chmialnickaha i Vialiki Haściniec da pratestujučych maładziečancaŭ padjechaŭ mikraaŭtobus ź minskimi amapaŭcami. Siłaviki zatrymali adnaho z udzielnikaŭ akcyi — Mikałaja Alejnika. Niekalki čałaviek padbiehli da milicyjantaŭ, zaviazałasia bojka i siłaviki źjechali. Kadry patasoŭki kala milicejskaha mikraaŭtobusa vyklikali vialiki rezanans, bo na adnym ź videa bačna, što ŭ niejki momant u rukach adnaho z amapaŭcaŭ apynuŭsia pistalet.
Za patasoŭku amapaŭcaŭ i pratestoŭcaŭ sudździa Viktoryja Palaščuk asudziła 29 vieraśnia dvuch maładziečancaŭ — Paŭła Piaskova i Uładzisłava Jeŭścihniejeva— da 3 hadoŭ i 3 miesiacaŭ i troch hadoŭ pazbaŭleńnia voli adpaviedna. Jany ŭžo adbyvajuć terminy ŭ kałonijach i pryznanyja pravaabaroncami palitviaźniami.
41-hadovaha maładziečanca Siarhieja Niepahodu zatrymali 17 sakavika hetaha hodu ŭ internacie ŭ pasiołku Mietałabud na ŭskrainie Pieciarburha, dzie žyŭ biełarus. MUS Biełarusi śćviardžaŭ, što maładziečaniec źjechaŭ u Rasiju letam minułaha hoda, kab schavacca ad kryminalnaha pieraśledu «paśla hrupavoha napadu na AMAP».
Siarhieja paŭhoda trymali ŭ adnym ź SIZA Sankt-Pieciarburhu. 16 vieraśnia jon pavinien byŭ vyjści na svabodu, bo skončyŭsia termin jaho ŭtrymańnia pad vartaj. Ale ŭ hety ž dzień jon byŭ paŭtorna zatrymany za parušeńnie mihracyjnaha režymu (art. 18.8 KaAP RF). 18 vieraśnia Kołpinski sud pryniaŭ rašeńnie ab jaho prymusovym vypravadžeńni ŭ Biełaruś. 17 kastryčnika jaho dastavili ŭ Biełaruś mienavita pa administracyjnym artykule, a nie pa zapycie biełaruskich siłavikoŭ.
U Biełarusi jaho źmiaścili ŭ SIZA na padstavie zaviedzienaj suprać jaho kryminalnaj spravy pa č. 2 art. 363 KK (supraciŭ z prymianieńniem hvałtu).
Paciarpiełymi na sudzie nad Piaskovym i Jeŭścihniejeva vystupili supracoŭniki AMAPa Minabłvykankama Viačasłaŭ Jakavienka i Jaŭhien Baranaŭ (kamandzir atrada). Z-za atrymanych padčas patasoŭki paškodžańniaŭ — niekalki drapin na ruce i kalenie — amapaŭcy nie stracili pracazdolnaść i nie znachodzilisia na lačeńni.
Pamočnica prakurora Julija Žuk, jakaja vystupała dziaržabvinavaŭcaŭ pa spravie suprać adzinaborca Alaksieja Kudzina, zapytała ŭ suda pakarańnie dla Niepahody try hady kałonii va ŭmovach ahulnaha režymu. Mienavita takoje pakarańnie i pryznačyŭ sudździa Alaksiej Pietrusievič. Akramia hetaha, sud pastanaviŭ vypłacić paciarpiełamu amapaŭcu 2500 rubloŭ maralnaj škody.
