«Biełaruś nie roŭna Łukašenku». Bujnoje vydańnie «Ukrainskaja praŭda» apublikavała list biełarusaŭ ukraincam

Fota: Pierre Crom / Getty Images

Ciapier u adras usich biełarusaŭ laciać abrazy i paproki. Za apošnija niekalki dzion z bratoŭ my pieratvarajemsia ŭ vorahaŭ.

Tak, zaraz na vašyja damy laciać rakiety, zapuščanyja ŭ tym liku i z terytoryi Biełarusi, ale taksama ŭ vašych šerahach zmahajucca dziasiatki biełarusaŭ, u tym liku ŭ składzie terabarony.

U «Azova» jość biełaruskaja rota.

Ciapier usiudy šmat nianaviści, złości i strachu. Ci dapamoža nianaviść da biełarusaŭ skončyć vajnu? Nie.

Biełarusy z vami. 27 lutaha pa ŭsioj krainie vyjšła kala 10 000 čałaviek, kab skazać «Nie vajnie». Heta byŭ dzień «refierendumu», jaki ŭ našaj krainie ničoha nie vyrašaje, i ludzi vykazvali svoj pratest, pakazvajučy nakiravańnie ruskaha karabla ŭ biuleteniach i malujučy ściahi Ukrainy i svabodnaj Biełarusi.

My vyjšli na vulicy ŭ znak pratestu. Bolš za 800 čałaviek było aryštavana. Hetaha nie dastatkova? Mahčyma.

Ale ŭ 2020-m biełarusy pa ŭsioj krainie vyjšli baranić svaje hałasy, jakija byli ŭ čarhovy raz skradzienyja na vybarach. Sotni tysiač ludziej išli pa hałoŭnych vulicach mnohich haradoŭ Biełarusi z kvietkami i pieśniami. U nas nie atrymałasia. U adkaz my ŭbačyli katavańni, aryšty, źbićcio, zhvałtavańni i zabojstvy tych, chto byŭ nie zhodny z uładami.

Toje, što adbyvajecca ŭ Biełarusi z taho času — heta stalinskija represii. Za paŭtara hoda była źniščana ŭsia hramadzianskaja supolnaść, zakryty amal usie NDA — ad pravaabarončych da arnitałahičnych i spartyŭnych kłubaŭ.

Bolš za tysiaču palitviaźniaŭ i sotni tysiač tych, chto vymušany byŭ pakinuć krainu z adnym zaplečnikam, kab nie apynucca ŭ turmie. Tak, u našych turmach katujuć. Tyja, chto vyjšli 27-ha, a potym i 28 lutaha, viedali, na što iduć.

Siońnia luboje inšadumstva ŭ Biełarusi karajecca.

Koler škarpetak, žoŭta-sinija kvietki, adzinočnyja pikiety ź dziciem, «Nie vajnie!», skazanaje krychu hučniej, čym šeptam, — za ŭsio heta ludzi adpraŭlalisia i adpraŭlajucca ŭ turmy ź niečałaviečymi ŭmovami. Ale jany praciahvajuć vychodzić i pratestavać suprać vajny.

Siońnia vyjści ŭ centr Minska z płakatam u padtrymku Ukrainy - heta jak vyjści ŭ akupavanaj Hiermanii pratestavać suprać kancentracyjnych łahieraŭ.

Biełarusy nie žadajuć vajny. My žyviem pad akupacyjaj.

I kali jašče paŭhoda tamu možna było skazać, što heta akupacyja ŭnutranaja, to zaraz pa našych darohach raźjazdžaje rasijskaja technika, jakuju nichto, akramia rasijskaha vasała, siudy nie klikaŭ.

Mienavita tak, tamu što možna nazyvać siabie prezidentam, ale pry hetym być prezidentam prachadnoha pakoja ŭ internacie.

Hramadzianin Łukašenka nie prymaje rašeńni, jamu davodziać ich, pakidajučy kiravać tolki pasadkaj zbožžavych i adkryćciom dziciačych spartovych spabornictvaŭ. I, praciahvajučy mietafaru prachadnoha pakoja, — jość adčuvańnie, što kali biełarusy lahuć pad rasijskija tanki (jak rajać mnohija ŭkraincy ŭ sacsietkach), to tankisty, nie zadumvajučysia, prajeduć pa ich — chto źviartaje ŭvahu na prachadny pakoj?

Biełarusy dapamahajuć ukraincam. Źbirajuć srodki na dapamohu vojsku i biežancam, źbirajuć dobraachvotnikaŭ, jakija hatovyja ŭstać u šerahi ŭkrainskaj armii ci dapamahać u jakaści lekaraŭ.

Biełarusy ŭžo zmahajucca popleč z ukrainskimi sałdatami. Adzin ź pieršych zahinułych na Majdanie byŭ biełarus. Biełarusy zmahalisia tady i praciahvajuć zmahacca na baku ŭkraincaŭ. Biełarusy zapuścili kartu dapamohi ŭkraincam MAPAHELP.ME , jakaja dapamahaje tym, chto hatovy dapamahać z tymi, kamu patrebna dapamoha.

Siońnia, kali jość aściarohi, što chutka armija Łukašenki moža pačać aktyŭny ŭdzieł u vajnie, biełarusy robiać usio mahčymaje, kab biełaruskija vajskoŭcy nie išli na vajnu, admaŭlalisia vajavać ci zdavalisia ŭ pałon.

Biełaruskija kibier-partyzany atakavali kampjutarnuju sietku Biełaruskaj čyhunki i faktyčna pieraviali jaje ŭ ručny režym kiravańnia.

Jašče adna kamanda adrapartavała ab pryviadzieńni šlachoŭ u fizičnuju nieprydatnaść — i ŭsio dla taho, kab prypynić ruch ešałonaŭ u bok ukrainskaj miažy.

Biełarusy ≠ armija Łukašenki. Siońnia na našaj terytoryi jość dźvie krainy: Biełarusija i Biełaruś.

Biełarusija, hety niepavarotlivy mamant minułaha, nie viedaje rodnaj movy i kultury, padtrymlivaje hramadzianina Łukašenku i ličyć, što vajna — heta norm.

Biełaruś — heta kraina, jakaja hałasavała za demakratyčnyja pieramieny, viedaje i pavažaje svaje movu i kulturu i adnaznačna vystupaje suprać vajny z Ukrainaj i ŭkraincami, ź jakimi ŭ nas tak šmat ahulnaha.

My žadajem žyć u Jeŭropie. Jak i vy. My chočam, kab ni ŭ koha nie ŭźnikała pytańniaŭ, što naša kraina - heta asobnaja kraina sa svajoj kulturaj i movaj. Jak i vy.

Naša historyja sychodzić hłybinioj u tysiačahodździ. Jak i vaša. Kamuści siońnia vielmi vyhadna pasvaryć biełarusaŭ i ŭkraincaŭ, kab abodva našyja narody zastalisia adny ź vialikim i ahresiŭnym susiedam. Kamu vyhadna? Voś mienavita hetamu vialikamu i ahresiŭnamu susiedu.

Usiaho, što my robim, — niedastatkova? U 2020 hodzie, kali my sotniami tysiač vychodzili na vulicy, kali nas katavali, bili i palivali chlorkaj kamiery, nabityja ludźmi tak, kab dychać było niemahčyma, śviet vykazvaŭ «krajniuju i hłybokuju zakłapočanaść». Chto vychodziŭ na vulicy haradoŭ u padtrymku biełarusaŭ? Tolki biełarusy.

Za hetyja paŭtara hady Ŭładzimir Zialenski nie znajšoŭ mahčymaści sustrecca z abranaj lidarkaj Biełarusi Śviatłanaj Cichanoŭskaj, zatoje znajšoŭ mahčymaść praciahvać kuplać naftapradukty ŭ režyma Łukašenki navat tady, kali heta z-za sankcyjaŭ pierastała rabić usia Jeŭropa.

Biełarusy zastalisia adny ŭ svaim kancłahiery 21 stahodździa. Ciapier, kali bolšaść biełarusaŭ padtrymlivaje ŭkraincaŭ i starajecca im dapamahać usim, čym moža, niahledziačy na vialikuju niebiaśpieku dla siabie i svaich siemjaŭ, mnohija ŭkraincy pačynajuć abvinavačvać biełarusaŭ va ŭsich hrachach.

Ale viedajecie, čamu biełarusy praciahvajuć dapamahać? Tamu što viedajuć, jak heta — zastacca sa svaimi prablemami sam-nasam, zastacca niepačutymi, zastacca biez dapamohi astatniaha śvietu. I my nie žadajem, kab ukraincy zastalisia adny. Tamu što nasupierak vašym zrazumiełym emocyjam my pa-raniejšamu ličym vas rodnymi. I spadziajemsia, što heta ŭzajemna.

Nie dajcie vorahu razburyć toje, što budavałasia stahodździami.

Biełarusy z vami. Biełarusy nie žadajuć vajny. Biełaruś nie roŭna Łukašenku.

I biełarusy praciahnuć dapamahać vam zmahacca za svabodu, navat kali vojska Łukašenki vyrašyć adpravić svaich sałdat da vas.

Słava Ukraïni! Žyvie Biełaruś!