Ryhor Vasilevič pryniaŭ u siabie pradstaŭnic hramadskaj inicyjatyvy «Žančyny suprać biezzakońnia ŭ sudach i prakuratury».
13 žniŭnia hienieralny prakuror pryniaŭ u siabie hrupu žančynaŭ, pradstaŭnic hramadskaj inicyjatyvy «Žančyny suprać biezzakońnia ŭ sudach i prakuratury». Pra nahodu dla sustrečy i jaje vyniki raspaviała kiraŭnica inicyjatyŭnaj hrupy Halina Jubko. «9 lipienia hetaha hodu my ŭžo sustrakalisia z Ryhoram Vasilevičam, pieradali jamu zvarot udzielnikaŭ našaj hrupy z prośbaj naładzić razhlad našych spraŭ pa sutnaści. Skardzilisia na praktyku adpisak, jakija my ŭvieś čas atrymlivajem ad čynoŭnikaŭ» — patłumačyła Halina Pachomaŭna. Pa jaje słovach, pa vynikach lipieńskaj sustrečy žančyny atrymali ad hienieralnaha prakurora abiacańnie razhladu ich spraŭ pa sutnaści. Ale nieŭzabavie pačali iznoŭ atrymlivać adpiski. Tamu i było vyrašana sustrecca iznoŭ i pieradać čarhovy kalektyŭny zvarot. Siońnia ŭ Hienprakuraturu pryjšło tryccać šeść čałaviek, Ryhor Vasijevič pryniaŭ čatyroch pradstaŭnic hrupy. Pa słovach Haliny Jubko, hienprakuror pahadziŭsia ź jaje słovami, što praktyka adpisak prosta niedapuščalnaja. «Jon paabiacaŭ razabracca, skazaŭ, što spravy abaviazkova buduć razhledžanyja» — kaža kiraŭnica inicyjatyvy. I dadaje, što žančyny buduć źviartacca ŭ Hienprakuraturu da taho času, pakul kožnaja sprava nie budzie razhledžanaja pa sutnaści.
***
Nahadajem, što adnačasova hrupa žančynaŭ inicyjuje sustrečy z staršynioj Viarchoŭnaha sudu. Nahoda taja ž — adpiski ad čynoŭnikaŭ sudu. Adnak pośpiechu hetyja sustrečy pakul nie mieli.
