Zasłužany kalektyŭ «Nacyjanalny kancertny arkiestr Biełarusi» pad kiraŭnictvam Michaiła Finbierha adkryvaje 23‑i kancertny siezon. Adnoj ź jaho pieršych padziej budzie muzyčny fiestyval u Turavie, jaki projdzie 4 vieraśnia, paviedamili karespandentu BIEŁTA ŭ arkiestry.
Adnym ź jarkich momantaŭ hetaha kancertnaha siezona, biezumoŭna, budzie novy fiestyval u Minsku, pryśviečany biełaruskaj estradnaj pieśni. Jon abjadnaje adrazu try prahramy, adna ź jakich viadomaja «Śpiavajem z arkiestram!» dla maleńkich vykanaŭcaŭ z usioj Biełarusi. U prahramu novaha fiestyvalu ŭvajšli taksama kancert, prymierkavany da 80‑hodździa Uładzimira Karatkieviča, i tvorčy viečar narodnaha artysta Biełarusi kampazitara Eduarda Zaryckaha.
Fiestyval — nie adzinaje, čym paraduje svaich pakłońnikaŭ Nacyjanalny arkiestr Biełarusi ŭ novym siezonie. Budzie arhanizavany konkurs maładych vykanaŭcaŭ biełaruskaj estradnaj pieśni. U novym farmacie projdzie fiestyval u Mahilovie «Šlahier na ŭsie časy», jaki budzie składacca z šerahu aŭtarskich viečaroŭ viadomych śpievakoŭ i kampazitaraŭ. U Pinsku ŭpieršyniu projdzie fiestyval, pryśviečany muzycy, jakaja naradziłasia na hetaj paleskaj ziamli.
Pavodle słoŭ narodnaha artysta Biełarusi prafiesara Michaiła Finbierha, minuły siezon byŭ dla kalektyvu ŭdačnym. Arkiestr arhanizavaŭ i pravioŭ 12 fiestyvalaŭ, padrychtavaŭ 27 zusim novych prahram. Prahučali aŭtarskija kancerty kampazitaraŭ Karłoviča, Vahniera, Smolskaha i paeta Adama Rusaka. Byli padrychtavany i prajšli prahramy «Ad Maskvy da Bresta» — padarunak kalektyvu da 65‑hodździa vyzvaleńnia Biełarusi ad niamiecka‑fašysckich zachopnikaŭ, «7 cudaŭ Biełarusi», pryśviečanaja Hodu rodnaj ziamli, jubilejny, 20‑y, fiestyval džazu, konkurs maładych vykanaŭcaŭ biełaruskaj estradnaj pieśni ŭ Maładziečnie.
