Kiraŭnik Administracyi prezidenta Uładzimir Makiej padčas učorašniaj sustrečy z kiraŭnikom minskaha Ofisu ABSIE Hansam‑Jochanam Šmitam zajaviŭ, što nie bačyć sensu ŭ dalejšym isnavańni pradstaŭnictva.
«Biełaruski bok vymušany surjozna zadumacca nad pierśpiektyvami dalejšaj dziejnaści Ofisu ABSIE, u tym liku ŭ adnosinach pryznačeńnia novaha kiraŭnika. Tym bolš, abjektyŭnych pryčyn dla prysutnaści ABSIE ŭ Minsku niama», — ličyć sp.Makiej.
Šmit pakinie svaju pasadu ŭžo naprykancy vieraśnia, ale novy kiraŭnik jašče nie pryznačany, i nieviadoma ci budzie pryznačany.
Lider Partyi AHP Anatol Labiedźka miarkuje, što biełaruskija ŭłady vielmi daŭno chočuć pazbavicca pradstaŭnictva ABSIE ŭ krainie.«Jak by toje nie było, ale prysutnaść misii ABSIE śviedčyć, što situacyja z pravami čałavieka ŭ krainie kiepskaja. I hety Ofis źjaŭlajecca bialmom u vačach uładaŭ. Ciapier vielmi dobraja situacyja, kab skinuć ciažar ź plačej», — kaža A.Labiedźka.
Palityk miarkuje, što zakryćcio Ofisu jość zadačaj maksimum dla ŭładaŭ, zadačaj minimum źjaŭlajecca vyznačeńnie kadravaj palityki ŭ pradstaŭnictvie. «I hetuju spakusu stvaryŭ sam pasoł Šmit. Ułady pabačyli, što nie kožny zachodni dypłamat jość prablemaj i hałaŭnym bolem dla ich. Ofis pierastaŭ być hienierataram niejkich idej i inicyjatyŭ. Jak by my nie krytykavali ŭ svoj čas Vika, ale hety čałaviek nasamreč vykonvaŭ svaje funkcyi. I Vik, i Chajkien, i Pietersan pracavali ŭ našmat bolš składanych umovach. Šmit ža za apošni čas faktyčna pieratvaryŭsia ŭ daradcu ŭładaŭ», — ličyć A.Labiedźka.
Staršynia AHP miarkuje, što dalejšy los misii budzie zaležyć ad palityčnaj voli hałoŭnaha ofisu ABSIE. «Ułady ciapier nie ŭ toj situacyi, kab dyktavać svaje ŭmovy», — havoryć palityk.