Palityk Aleś Michalevič maje namier vyłučyć svaju kandydaturu na prezidenckija vybary 2010-11 hadoŭ.Pra heta jon zajaviŭ u časie źjezdu Partyi BNF u subotu. Z samoj partyi jaho vyklučyli praz kanflikt ź Vincukom Viačorkam i Lavonam Barščeŭskim. Tamu na źjeździe jon vystupaŭ jak namieśnik staršyni hramadskaha abjadnańnia BNF «Adradžeńnie».
«Naša Niva»: Aleś, kali vyrašyŭ bałatavacca na pasadu prezidenta?
Aleś Michalevič: Jašče letaś.
«NN»: Jak aceńvaješ svaje šancy na pieramohu?
AM: Jany jość, i buduć pavialičvacca ciaham praviadzieńnia efiektyŭnaj vybarčaj kampanii.
«NN»: Ty ŭžo pačaŭ hetuju kampaniju?
AM: Nie, jana pačniecca paśla aficyjnaha abviaščeńnia. Siońnia ja pra heta paviedamiŭ tolki svaim bližejšym paplečnikam z Partyi BNF. Aficyjnaje abviaščeńnie budzie ciaham miesiaca.
«NN»: Chto tvaja kamanda?
AM: Heta małaviadomyja ludzi, jakija adbylisia ŭ svaim prafiesijnym žyćci, jakija zarablajuć niemałyja hrošy. Heta prahramisty, žurnalisty, pradprymalniki. Ludzi, jakija pracujuć u absalutna roznych halinach, ale jakich abjadnoŭvaje ahulnaje bačańnie budučyni Biełarusi.
«NN»: To bok jany biespartyjnyja?
AM: U absalutnaj svajoj bolšaści tak. Taksama ŭ absalutnaj bolšaści — heta ludzi maładyja.
«NN»: A ź Milinkievičam jak tvaje adnosiny dalej buduć raźvivacca?
AM: My znojdziem parazumieńnie. Prynamsi, ja źbirajusia vieści svaju vybarčuju kampaniju da pieramožnaha kanca.
«NN»: Jakija ŭ ciabie buduć łozunhi, temy?
AM: Pra heta budzie skazana na aficyjnaj prezientacyi.
