Alaksandr Milinkievič abmierkavaŭ z kiraŭnikom źniešniepalityčnaha viedamstva Słavakii Mirasłavam Łajčakam sacyjalnuju, ekanamičnuju i palityčnuju situacyju ŭ Biełarusi.
Palityki abmierkavali kroki, jakija pavinna zrabić Biełaruś na šlachu demakratyzacyi i libieralizacyi palityčnaha žyćcia krainy.
Lider Ruchu «Za Svabodu» sa škadavańniem adznačyŭ, što libieralizacyja na dadzieny momant maje paviarchoŭny charaktar, sistemnych i strukturnych zruchaŭ nie adbyvajecca. U krainie pa‑raniejšamu jość palityčnyja źniavolenyja, niama prahresu ŭ spravie vaŭkavyskich pradpramalnikaŭ, nie rehistrujucca palityčnyja partyi (Partyja BCHD, Partyja Svabody i Prahresu) i NDA; bolšaść niezaležnych haziet nie majuć dostupu k manapalizavanaj sistemie raspaŭsiudu; źmieny u vybarčy kodeks rychtujucca biez hramadskaha abmierkavańnia.
U razmovie ź Mirasłavam Łajčakam Alaksandr Milinkievič vykazaŭ pierakanańnie, što dynamika i intensiŭnaść supracy Jeŭraźviazu i mižnarodnych arhanizacyj musiać zaležyć ad kankretnych krokaŭ biełaruskich uładaŭ pa nabližeńni da jeŭrapiejskich standartaŭ u halinie pravoŭ čałavieka i demakratyi. Hety praces nie moža mieć adnabakovy ruch.
Sustreča Alaksandra Milinkieviča i Mirasłava Łajčaka adbyłasia ŭ Minsku 6 vieraśnia i doŭžyłasia amal hadzinu.
