Rasija, Aŭstryja i Turcyja — chto kaho? 1

Kolkaść abanientaŭ mabilnaj suviazi ŭ Biełarusi skłała 9 miljonaŭ čałaviek. Heta pakul što nie pieravyšaje ahulnaj kolkaści nasielnictva. Praniknieńnie mabilnaj suviazi ŭ krainie składaje 93%.

Mabilniki pracujuć navat tam, kudy jašče nie dajšli stacyjanarnyja telefony.

Try hulcy na rynku mabilnaj suviazi reprezientujuć try roznyja krainy. Heta MTS (Rasija), Velcom (Aŭstryja) i Life:)(Turcyja). Paśla taho, jak dziaržava pradała svaje akcyi zamiežnym kampanijam, na rynku značna ŭzrasła kankurencyja.

Ceny nie abvalilisia, ale kolkaść cikavych prapanovaŭ i taryfaŭ značna ŭzrasła. Vajna za spažyŭca na ruku samomu spažyŭcu.

25000 rubloŭ z abanienta

Paśpiachovaść apieratara mabilnaj suviazi možna aceńvać pa niekalkich pakazalnikach.

Pa-pieršaje, heta kolkaść abanientaŭ.

MTS utrymlivaje liderstva z 4,483 miljonami abanientaŭ. Da Velcom padklučana 3,817 miljona čałaviek. Life:), niahledziačy na samyja chutkija tempy rostu, daloka-daloka zzadu — 0,6 miljonaŭ karystalnikaŭ.

Inšaje pytańnie, jakaja dola z hetych abanientaŭ aktyŭnaja. Niama nijakaj prablemy razdać biaspłatna sim-karty ŭsioj Biełarusi — u abanienty budzie zapisana 10 miljonaŭ čałaviek, a prybytak zastaniecca raniejšym, bo šmat chto nie budzie karystacca suviaźziu.

Tamu

druhi istotny pakazalnik fiksuje kolkaść hrošaj, patračanych siaredniestatyčnym abanientam kampanii.

Abanient Velcom u siarednim pa-raniejšamu hienieruje bolš abarotu za klijenta MTS. $8,7 za miesiac suprać $7,8. Life:) znoŭ u inšaj vahavaj katehoryi. Z kožnaha karystalnika turkam ŭdajecca atrymać usiaho $1,5.

Kali ž razhladać ułasna prybytak kampanij za pieršaje paŭhodździe 2009 hoda, to vyśviatlajecca, što lideram staŭ Velcom — $39 miljonaŭ. MTS zarabiŭ $35 miljonaŭ, a Life:) napracavaŭ u minus $11 miljonaŭ.

Chutkaja dapamoha Velcom

Apieratary nie škadujuć hrošaj na rekłamu. Pa padlikach kampanii «Miedyjataktyka»,

trojku samych aktyŭnych rekłamadaŭcaŭ Biełarusi składajuć mienavita apieratary mabilnaj suviazi. Razam jany zajmajuć kala 18% rekłamnaha rynku krainy.

Voś što značyć kankurencyja!

Ale kali łajfaŭski mister Padklučalnik i mts-aŭski krykun ŭ teatry pastajanna kruciacca ŭ televizary, to rekłamy Velcom doŭha nie było vidać. Aŭstryjskaja kampanija časova nie supracoŭničała z kanałami, jakija adnosiacca da Biełteleradyjokampanii, praz asabisty kanflikt z Alaksandram Zimoŭskim. Tamu pierastaŭ padabacca ŭzrovień pasłuh apieratara. Baki parazumielisia, ale, jak kažuć, asadak zastaŭsia. Tym nie mienš, Velcom nie adčuvaje siabie abdzielenym. Siarod jaho karparatyŭnych klijentaŭ, naprykład, chutkaja dapamoha.

Paraŭnańnie z susiedziami

Zamiežnyja mabilnyja apieratary adaptujuć svaje taryfy da biełaruskaha rynku. Ci adroźnivajucca jany ad tych, što jość u susiednich krainach?

Life:) pracuje ŭ Turcyi, Biełarusi i Ukrainie. Asnoŭny taryfny płan — «Svabodny». Zvanki ŭnutry sietki biaspłatnyja, zvanki ŭ inšyja sietki ŭ Biełarusi — 249 rubloŭ, va Ukrainie (u pieraliku na rubli) — 330 rubloŭ. Pieradapłata ŭ nas — 10000 rubloŭ, va Ukrainie — 8500 rubloŭ. Jak bačna, prapanovy pryblizna roŭnyja.

A voś MTS u Biełarusi, Rasii i Ukrainie prapanuje roznyja taryfy. Naprykład, kantraktny taryf «Budź bolš praktyčnym» z abanienckaj płataj u 6000 rubloŭ i zvankami ŭnutry sietki pa 60 rubloŭ. U čymści jon pieraklikajecca z ukrainskim «MTS pieršy» z płataj u 5000 rubloŭ u miesiac. Ale tam prapanujucca zvanki pa 33 rubli za pieršuju chvilinu razmovy i 11 rubloŭ za nastupnyja. Ukrainski varyjant vyhadniejšy. A voś

rasijski MTS ad abanienckaj płaty amal admoviŭsia. Jana zachavana tolki na elitnych bieźlimitnych taryfach. Možna mierkavać, što tendencyja admovy ad abanienckaj płaty piarojdzie i na biełaruskuju filiju.

Velcom u susiednich krainach nie pracuje, tamu paraŭnoŭvać jaho taryfy niama z čym.

Ceny taryfnych płanaŭ na mabilnuju suviaź u Jeŭropie vyhladajuć značna vyšejšymi, čym u Biełarusi. Praŭda, za košt pastajannych akcyj i źnižak tam biez prablem adšukać biaspłatnyja varyjanty.

Kolkaść abanientaŭ, młn
MTS 4,483
Velcom 3,817
Life:) 0,6

Kolkaść hrošaj, patračanych abanientam za miesiac, $
Velcom 8,7
MTS 7,8
Life:) 1,5

Prybytak kampanij za pieršaje paŭhodździe 2009, młn $
Velcom 39
MTS 35
Life:) -11

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH