U Pałacy mastactvaŭ (Kazłova,3) praciahvajecca vialiki art-fiestyval «Dach-9»: niaŭtomnyja Rodzin i K užo pamianiali ekspazicyju ŭ hałoŭnych załach, a na troch pavierchach pałacu amal štodnia adbyvajucca kulturnyja imprezy: pierfomansy, sieansy aŭdyjo- i videaartu, litaraturnyja viečaryny i maksi-kancerty.
«Kožny dzień na fiestyval prychodzić šmat narodu, — kaža adna z rabotnic Pałacu, — to na pieršy pavierch raptam idzie sucelnaja čornaja ściana padletkaŭ — tam budzie rok-kancert, to na druhim paralelna chodziać ludzi z vymazanymi farbaj tvarami — u ich tolki što adbyŭsia pierfomans. My navat takoha nie čakali: zazvyčaj u nas sucelnaja cišynia».
10 vieraśnia ŭ Pałacy mastactvaŭ adbyŭsia vystup unikalnaj teatralnaj supołki «Alter Eha». Asnoŭny skład supołki 7 čałaviek — usie jany stałyja nasielniki minskaha psichanieŭrałahičnaha internatu № 3.Aktory pradstaŭlali žanrava roznyja numary: teatralnyja i pantamimičnyja minijatury, vakalnyja i chareahrafičnyja numary. Ludzi ź psichafizičnymi asablivaściami i intelektualnymi abmiežavańniami mohuć być fantastyčnymi aktorami, što i davioŭ vystup supołki. «Bolšaść svajho žyćcia našyja artysty baviać u ścienach internata, — kaža Śviatłana Jacevič-Padlivamčava, kiraŭnička hrupy, — I tamu kali nas zaprašajuć na kancert, dyk dla trupy — heta jak hłytok śviežaha pavietra. Vielmi škada, što ŭ Minsku nas bajacca zaprašać: my nie tolki žyvimsia stanoŭčaj enierhietykaj ad hledačoŭ, ale i sami z radaściu dzielimsia svaimi, paviercie, časam značnymi, talentami».
Art-fest praciahniecca da 20 vieraśnia. Z najbližejšych imprezaŭ festu:
11 vieraśnia — prezientacyja aŭdyjodyska z zapisam tvoraŭ historyka Mikoły Jermałoviča «Listy. Vystupy. Hutarki.Vieršy» 12 i 13 vieraśnia — vystypajuć hurty Mouches a l'orange, Kusudama, project_May_B, Gentle Bombardies, a taksama vystupy dy-džejaŭ (Pačatak a 17). 13 vieraśnia z 18-aj – viečar, pryśviečany fiłamatam i fiłaretam i pakaz filma «Pan Tadevuš».Akramia vystupaŭ, možna pahladzieć karciny i art-abjekty sa stałaj ekspazicyi.
0
0
0
0
0
0
