Fota Andreja Lankieviča
Na feście zastoj, a siarod adkryćciaŭ iznoŭ mahiloŭcy. Z Haradka viarnuŭsia Siarhiej Budkin.
17-ha pa liku «Basovišča» čakali ŭsie. Udzielniki supołki «Studenty.by» – kab davieści, što jany zdolnyja zładzić najbujniejšy biełaruski fest nia horš, čym raniejšyja arhanizatary. Udzielniki konkursu – u spadzievie, što im abłomicca biaspłatny zapis albomu, a hledačy – kab iznoŭ akunucca ŭ tuju niezabyŭnuju atmasferu va ŭročyščy Barok, kali možna pačuć ulubionyja pieśni ź jakasnym hukam dy pamatlać pry hetym Svaim Ściaham. «Vy na Haradok? Hej-la-la budzie?» – pytajecca na biełastockim vakzale tamtejšy prychilnik «eneremaŭ» i radujecca našamu stanoŭčamu adkazu. «Kolki možna smažyć adnu i tuju ž katletu?» – skiepsis zychodzić z vusnaŭ lidera «Zero-85» Sieńki pry aznajamleńni z prahramaj sioletnich «Basaŭ». Častka vystupoŭcaŭ sapraŭdy ŭdzielničała ŭ letašnim i pazaletašnim festach. Adnak byli i siurpryzy.
Lohki pieršy dzień
Aficyjna «Basovišča-2006» svaim vystupam adkryli litoŭskija rok-zorki z «IR», jakija dziela cikavaści pahadzilisia pryjechać za biascenak. Prystojny eŭra-rok mała chto acaniŭ – jašče zaśvietła, i la sceny taŭkucca tolki tutejšyja. Vakalist «IR» Hierman paśla naviedańnia «Basoŭ» ćviorda vyrašyŭ vučyć biełaruskuju movu i paabiacaŭ navat zapisać pieśniu pa-biełarusku – jahony dzied koliś kiravaŭ biełaruskim choram u Vilni.
Pierad litoŭcami ŭ miežach «Volnaj sceny» hrymieli miascovyja hurty. Adzin ź ich vykonvaŭ typova kabackija pieśni i raspužaŭ niešmatlikich hledačoŭ svaim kaveram na «Jechali na trojcy z bubiancami».
«Basovišča» kančatkova adyšło ad svajho ciažkaha farmatu i stała bolš roznastylovym. Ale ad hetaha nia stałasia modnym eŭrapiejskim festyvalem. U pieršy dzień pałova vystupoŭcaŭ byli z Polščy. Na pravach haspadaroŭ ihrali haradockija «5set5» i «Rima», jakija mała kaho abudzili. Ad urocłaŭskaj «Siddhartha» zychodziła jašče mieniej drajvu. Chaciełasia b pačuć sapraŭdy najlepšyja polskija kamandy pobač ź biełaruskimi muzykami.
Skandalnaja pieśnia Krova
U pieršy dzień zapomniŭsia svajoj skandalnaj pieśniaj «Čyrvonym pa biełym» Kroŭ, u jakoj jon nadavaŭ aplavuch šerahu biełaruskich rok-zorak. Dzikavata padpiavali pieršyja šerahi: «Pamidor-of/Fak-of!» «Chip-chop – heta najpierš ščyraść. I ja nie chaču chavać svajo staŭleńnie da niekatorych asobaŭ», – rastłumačyŭ mnie reper, jaki padčas vystupu źniaŭ svaju firmovuju masku.
U hadzinu nočy čaravała svajoj muzykaj «Trojca», jakaja sioleta debiutavała na «Basoviščy». Kali b davali specpryz za samy mahutny hołas festu, jaho b atrymaŭ Ivan Kirčuk – «Jabłyń maja» hučała na ŭvieś absiah, budziačy ŭ namiotach pry- chmialełych haściej i nie dajučy haradockim zasnuć u svaich chatach.
Biaź źmienaŭ
Mlavaje ranišniaje soniejka budzić časovych žycharoŭ Barka. Raniej za astatnich uzdymajucca kankursanty. Mienavita jany raspačnuć druhi dzień festu. Sioleta na «Basovišča» trapili dziesiać kamandaŭ – absalutna roznych u stylistyčnym planie i prykładna roŭnych pa ŭzroŭni. Vyniatak – hurt «Mocart», jakomu daviałosia hrać pieršamu. Muzyki dobra papracavali ŭ ahitacyjnym planie (ich vybrali pavodle vynikaŭ internet-hałasavańnia na «Tuzinie hitoŭ»), ale ž ich naiŭny pop-rok ź biednymi aranžyroŭkami i jašče biadniejšymi tekstami mała kaho kranuŭ.
Z adkryćciaŭ konkursu – iznoŭ mahiloŭcy. Vydatnaja love-rok-kamanda «Vodar Susviet» z klavišami i hitarnym drajvam (kryšačku pad «HIM»), prostymi pieśniami i pazytyŭnaj enerhijaj.
A słem možna zładzić pad inšych mahiloŭcaŭ – «Nevma». Ich vakalist zapalvaŭ na scenie – kali b Mulavin naradziŭsia paśla śmierci Brežnieva, jon by vykonvaŭ takuju muzyku.
Pavodle vynikaŭ konkursu mahiloŭcy ŭziali svaje pryzy. «Vodar Susviet» atrymaŭ elektrahitaru ad radyjo «Racyja», a «Nevma» – pryz ad radyjo «Palonija» za «najlepšy debiut».
Asnoŭny pryz (ad BASu i studyi «Apollo Records») dastali «veterany» adboru – hurt «Parason» na čale z Andrejem Karpovičam, viadomym jašče jak minimum z troch hurtoŭ – «Młyn», «Bip» i «Krona».
«Parasonaŭcy» byli ŭpeŭnieny ŭ svajoj pieramozie, ale ŭsio roŭna radavalisia jak dzieci. Druhimi hierojami konkursu stali maładzieńkija «S.D.M.» – mentalnyja braty «Mroi» – «N.R.M.», jakija atrymali prava biaspłatna zapisać svoj albom na studyi «Rembrant».
Staršynia žury Lavon Tarasevič sa sceny žorstka prachodzicca pa kankursantach, kažučy, što konkurs na «Basach» pieratvarajecca ŭ niejkuju «Słavianskuju vosień». Toj ža Sieńka z «Zero-85» za scenaj kaža, što «Basovišča» pieratvarajecca ŭ «zapaviednik biełaruskaha roku».
Razmovy pra zastoj na «Basoviščy» nie ścichajuć užo katory hod, ale kardynalna na feście ničoha nie mianiajecca. «Basovišča» zastajecca adnačasova najbujniejšym biełaruskim rok-festyvalem i miestačkovaj źjavaj. Ci jak možna nazvać fest, jaki pravodzicca biez surjoznaj reklamnaj kampanii, pres-kanferencyj, z aby-jak sklapanaj prahramaj, biez charyzmatyčnych viadučych i surjoznych muzykaŭ z polskaha boku?
