prymierkavanaj da 10-hodździa źniknieńnia palityka Viktara Hančara i biźniesmiena Anatola Krasoŭskaha.
Alesia Ściepanienku źbili 16 vieraśnia ŭ RUUS Centralnaha rajonu . Fota belhelcom.org
Staršynia Jeŭrasajuza Šviecyja vykazała zakłapočanaść u suviazi z razhonam mirnaj demanstracyi 16 vieraśnia ŭ Minsku, prymierkavanaj da 10-hodździa źniknieńnia palityka Viktara Hančara i biźniesmiena Anatola Krasoŭskaha.
U zajavie ad 17 vieraśnia ŭtrymlivajecca zaklik da biełaruskich uładaŭ ustrymacca ad prymianieńnia siły adnosna mirnych demanstrantaŭ i zabiaśpiečyć mahčymaść žurnalistam vykonvać svaje abaviazki.
Staršynstva zaklikała aficyjny Minsk pradoŭžyć rabotu nad palapšeńniem u halinie demakratyi i vykanańnia pravoŭ čałavieka.
Uviečary na Kastryčnickaj płoščy Minska było zatrymana prykładna 35 aktyvistaŭ apazicyi, jakija mieli namier pravieści akcyju z nahody 10-hodździa źniknieńnia Hančara i Krasoŭskaha. Udzielniki akcyi stali na kraju płoščy ŭzdoŭž praśpiekta Niezaležnaści ŭ łancuh z partretami źnikłych. Praktyčna adrazu ž udzielnikaŭ akcyi błakiravali supracoŭniki milicejskaha śpiecnaza, adharadziŭšy ich ad prajeznaj častki praśpiekta. Z prymianieńniem siły demanstrantaŭ zašturchali ŭ milicejskija aŭtobusy i dastavili ŭ RUUS Centralnaha rajona. Siarod zatrymanych byli Mikałaj Statkievič, Siarhiej Skrabiec, Jaŭhien Afnahiel.
Milicyja taksama pieraškadžała žurnalistam pravodzić fota- i videazdymku.
Biełaruski Chielsinkski kamitet u raspaŭsiudžanaj 17 vieraśnia zajavie paviedamlaje, što ŭ milicyi demanstrantaŭ «źbivali, katavali (ich stavili na «raściažku», h.zn. kali nohi rasstaŭleny maksimalna šyroka) i źnievažali (prapanovy homasieksualnaha charaktaru, adrazańnie vałasoŭ); u ich adras pastajanna hučała niecenzurnaja łajanka».
Napiaredadni akcyi, 15 vieraśnia staršynia Abjadnanaj hramadzianskaj partyi Anatol Labiedźka źviarnuŭsia ź listom da ministra ŭnutranych spraŭ Anatola Kulašova, u jakim zaklikaŭ orhany pravaparadku nie pieraškadžać praviadzieńniu mierapryjemstvaŭ, prymierkavanych da 10-hodździa źniknieńnia Hančara i Krasoŭskaha. «Ja zaklikaju milicyju i śpiecsłužby ŭstrymacca ad prymianieńnia fizičnaj siły ŭ dačynieńni da mirnych udzielnikaŭ akcyj, jakija buduć prachodzić 16 vieraśnia nie tolki ŭ Minsku, ale i ŭ mnohich inšych haradach Biełarusi», — zajaviŭ Labiedźka. Pry hetym jon padkreśliŭ, što «ŭ mnohich jeŭrapiejskich stalicach u hety dzień buduć uvažliva sačyć za padziejami ŭ Biełarusi, tamu što pytańnie palityčnych źniknieńniaŭ nie źniata ź jeŭrapiejskaha paradku dnia».
