Kolkaść nasielnictva Biełarusi na 1 vieraśnia, pavodle apieratyŭnych źviestak, skłała 9 młn. 663,4 tys. čałaviek, paviedamiła pres‑sakratar Nacyjanalnaha statystyčnaha kamiteta Alena Kandracienka.
U paraŭnańni z 1 vieraśnia 2008 hoda žycharoŭ krainy stała mienš na 12,8 tys. čałaviek.
Za minuły hod kolkaść nasielnictva pavialičyłasia tolki ŭ Minsku — z 1 młn. 814,5 tys. čałaviek da 1 młn. 839,4 tys. U astatnich rehijonach respubliki kolkaść žycharoŭ źmienšyłasia. U vyniku na 1 vieraśnia hetaha hoda ŭ Homielskaj vobłaści naličvałasia 1 młn. 462,7 tys. čałaviek, u Minskaj — 1 młn. 449,5 tys., u Bresckaj — 1 młn. 432,1 tys., u Viciebskaj — 1 młn. 260,5 tys., u Mahiloŭskaj — 1 młn. 118,8 tys., u Hrodzienskaj — 1 młn. 100,4 tys.
U studzieni‑žniŭni ŭ Biełarusi naradziłasia 73,1 tys. dziaciej — na 1,8 tys. dzietak bolš u paraŭnańni sa studzieniem‑žniŭniem minułaha hoda. Pamierli za vosiem miesiacaŭ 2009 hoda 89,4 tys. čałaviek — na 0,8 tys. bolš.
Ahulny kaeficyjent naradžalnaści ŭ studzieni‑žniŭni hetaha hoda ŭ cełym pa krainie skłaŭ 11,4 na 1000 žycharoŭ, ahulny kaeficyjent śmiarotnaści — 13,9 na 1000 nasielnictva. Dla paraŭnańnia: u studzieni‑žniŭni 2008 hoda hetyja pakazčyki składali adpaviedna 11 i 13,6 pramile. Nazirałasia naturalnaje źmianšeńnie nasielnictva — z 2,6 da 2,5 na 1000 nasielnictva. Pakazčyk dziciačaj śmiarotnaści ŭ studzieni‑žniŭni biahučaha hoda skłaŭ 4,5 vypadku na 1000 novanarodžanych (za anałahičny minułahodni pieryjad — 4,6).
Siarod rehijonaŭ krainy samy vysoki ahulny kaeficyjent naradžalnaści adznačany ŭ Bresckaj vobłaści (12,2 na 1000 žycharoŭ), samy nizki — u Viciebskaj vobłaści (10 pramile).
Što datyčycca ahulnaha kaeficyjenta śmiarotnaści, to maksimalny pakazčyk byŭ u Viciebskaj i Minskaj abłaściach (15,9 pramile), minimalny — u Minsku (9,5 pramile).
U studzieni‑žniŭni hetaha hoda ŭ Biełaruś prybyli 12 tys. 754 čałavieki, vybyli 4 tys. 997 hramadzian. Mihracyjny pryrost za vosiem miesiacaŭ skłaŭ 7 tys. 757 čałaviek.
