«My paćviardžajem, što viadziom aktyŭnuju rabotu pa pryvatyzacyi, chočam, kab hety praces išoŭ bolš dynamična, z pryciahnieńniem inviestycyj u ekanomiku», — pra heta zajaviŭ siońnia premjer‑ministr Biełarusi Siarhiej Sidorski na sustrečy sa staršynioj nahladalnaha savieta polskaj inviestycyjnaj i kansałtynhavaj kampanii «A Ka Jot Inviestmient».
Siarhiej Sidorski nahadaŭ, što pieršy raz z pradstaŭnikami polskaj kampanii jon sustreŭsia 1 vieraśnia ŭ Hdańsku. Siońnia biełaruski bok hatovy pradoŭžyć dyjałoh. «Ciapier my pryniali rašeńnie ab stvareńni ŭ Biełarusi kansałtynhava‑inviestycyjnaj kampanii z udziełam «A Ka Jot Inviestmient», — adznačyŭ premjer.
Jon kanstatavaŭ, što ŭ Biełarusi aktyŭna akcyjanirujucca pradpryjemstvy ź dziaržaŭnym kapitałam.
Bolš jak 40 pracentaŭ pradpryjemstvaŭ Biełarusi — akcyjaniernyja tavarystvy.
«Nam chaciełasia b, kab hety praces išoŭ bolš aktyŭna i pryciahvaŭ na hetyja pradpryjemstvy inviestycyi. Ale Biełaruś zacikaŭlena nie ŭ samoj pryvatyzacyi, a ŭ tym, kab akcyjaniravanyja pradpryjemstvy razhladalisia jak patencyjalnyja dla stvareńnia novych vytvorčaściej, kankurentazdolnaj pradukcyi siońniašniaha i zaŭtrašniaha dnia», — padkreśliŭ kiraŭnik biełaruskaha ŭrada.
Siarhiej Sidorski vykazaŭ upeŭnienaść u tym, što sustreča pasłužyć dalejšamu raźvićciu adnosin i vyrašeńniu mnohich pytańniaŭ pa pryvatyzacyi. Pry hetym premjer‑ministr adznačyŭ, što biełaruski bok nie skryvaje infarmacyju ab viadzieńni pierahavoraŭ pa pytańniach pryvatyzacyi ź inšymi kansałtynhavymi kampanijami. «Čym chutčej my znojdziem uzajemarazumieńnie, kampramis, tym chutčej buduć vyrašacca hetyja pytańni i raźvivacca praces pryvatyzacyi», — dadaŭ jon. Siarhiej Sidorski vykazaŭ upeŭnienaść, što polskaja kampanija budzie ŭdzielničać u hetym pracesie.
Peŭnym etapam pa pryvatyzacyi ŭ Biełarusi źjaŭlajecca rabota pa stvareńniu pryvatyzacyjnaha ahienctva.
Premjer‑ministr dadaŭ, što nie vyklučana i inšaja forma raboty, jakaja daść bolšy ruch u pracesie pryvatyzacyi.
Biełaruś zacikaŭlena ŭ supracoŭnictvie z kampanijaj «A Ka Jot Inviestmient» i čakaje ad jaje kankretnych prapanoŭ pa raźvićciu pryvatyzacyjnaha pracesu ŭ krainie. Siarhiej Sidorski padkreśliŭ, što intares da kampanii zasnavany nie stolki na jaje kansałtynhavych funkcyjach. «Nam chaciełasia b pracavać z vami pa pryciahnieńniu inviestycyjnych resursaŭ i vykarystoŭvać tut isnujučy ŭ vas vopyt», — skazaŭ premjer.
Staršynia nahladalnaha savieta «A Ka Jot Inviestmient» Jan Vaha paviedamiŭ, što paśla sustrečy ŭ Hdańsku padrychtavany prapanovy pa pryvatyzacyi. Dvaccacihadovy vopyt polskich pradpryjemstvaŭ, u pryvatyzacyi jakich udzielničała kampanija, moža być vykarystany ŭ Biełarusi. «Pryvatyzacyja pavinna padrychtavać pradpryjemstvy, kab jany zaniali dobraje, kankurentazdolnaje miesca ŭ suśvietnaj ekanomicy», — skazaŭ Jan Vaha. Hałoŭnaje ŭ hetym pracesie, ličyć jon, papaŭnieńnie biudžetu. Kampanija hatova vykarystać usie svaje mahčymaści dla raboty ŭ Biełarusi, padkreśliŭ polski hość.
Hrupa «A Ka Jot Inviestmient» — viadučaja pryvatnaja polskaja inviestycyjnaja i kansałtynhavaja kampanija. Asnoŭny vid dziejnaści — kiravańnie pryvatnymi inviestycyjnymi fondami, ažyćciaŭleńnie inviestycyj u inavacyjnaj śfiery, na rynku nieruchomaj majomaści, a taksama biźnies‑ i finansavy kansałtynh. Za apošnija 15 hadoŭ kiraŭnik hrupy Jan Vaha realizavaŭ inviestycyjnyja prajekty na ahulnuju sumu amal $5 młrd.
«A Ka Jot Inviestmient» prapanuje kansałtynhavyja pasłuhi pa pytańniach źlićcia i rearhanizacyi pradpryjemstvaŭ, prapracoŭcy stratehii raźvićcia, restrukturyzacyi fondaŭ. Kansałtynh pa pytańniach realizacyi prajektaŭ u śfiery NDVKR ažyćciaŭlajecca asobnaj daččynaj kampanijaj «Centr inavacyj i technałahičnych inviestycyj». Inviestycyjnaja dziejnaść «A Ka Jot Inviestmient» ažyćciaŭlajecca praz šerah inviestycyjnych fondaŭ.
