Śledčy pa «vaŭkavyskaj spravie» Vital Kłačko admaŭlajecca vydać jurystu Alehu Voŭčaku hienieralnuju davieranaść siamji Aŭtuchovičaŭ na viadzieńnie spraŭ. Bolš za toje, jon patrabuje ad Aleny Aŭtuchovič źjavicca na dopyt dla dačy pakazańniaŭ, davać jakija žančyna suprać svajho muža admoviłasia, i pradstavić daviedku pra stan zdaroŭja.
Pra heta paviedamlaje sajt charter97.org sa spasyłkaj na «Biełorusskij partizan».
Pravaabaronca Aleh Voŭčak ličyć dziejańni śledstva poŭnym biezzakońniem.
«Alena Aŭtuchovič admoviłasia jašče na pačatku hetaj spravy davać pakazańni suprać siabie i svaich blizkich svajakoŭ, — zajaŭlaje Aleh Voŭčak. — Naturalna, ničoha supraćzakonnaha jana nie ździejśniła - kožny hramadzianin Biełarusi, pavodle Kanstytucyi, pavodle Kryminalna-pracesualnaha kodeksa, maje prava nie davać pakazańni suprać siabie i svaich blizkich. I nichto nie maje prava vyklikać svajakoŭ paŭtorna».
Pavodle słovaŭ Aleha Voŭčaka, 30 vieraśnia ŭ ofis, dzie pracavaŭ Mikałaj Aŭtuchovič, pryšoŭ list ad śledčaha. U im było skazana, što žonka palitviaźnia pavinna źjavicca da śledčaha, dać pakazańni ŭ jakaści śviedki i prynieści daviedki ab stanie jaje zdaroŭja.
Nahadajem, što 8 lutaha ŭ Vaŭkavysku byli zatrymanyja Mikałaj Aŭtuchovič, Jury Lavonaŭ i Uładzimir Asipienka. 18 lutaha vaŭkavyskim pradprymalnikam było pradjaŭlenaje abvinavačvańnie pa art. 218 Kryminalnaha kodeksa (naŭmysnaje źniščeńnie albo paškodžańnie majomaści). 23 červienia ŭ dačynieńni da Aŭtuchoviča i, jak paviedamiła MUS, «inšych asobaŭ» uzbudžanaja sprava pa art. 359 KK (terarystyčny akt) u vyhladzie padrychtoŭki (art. 13).
Pravaabaroncy ličać zatrymanych palityčnymi viaźniami, źviartajučy ŭvahu na toje, što Aŭtuchovič i Lavonaŭ raniej užo byli asudžanyja i pryznanyja mižnarodnaj supolnaściu viaźniami sumleńnia.
Vaŭkavyskaha pradprymalnika Juryja Lavonava vyzvalili ź mienskaha śledčaha izalatara 8 žniŭnia. 24 vieraśnia jamu paviedamili, što suprać jaho spyniena kryminalnaja sprava.
