Kaśmičnyja pryhody «BiełKA» adkryli ŭ hramadztvie dyskusiju: kudy nakiravać rozumy našych vučonych – u kosmas, na słužbu mirnamu atamu, a moža… Feljeton Lolika Uškina.
Uvažliva pračytaŭšy Jahony apošni śpič pierad dyplamatami, zrazumieŭ, što nam patrebna absalutna novaje pakaleńnie pryład i technalohij, jakija mahli b słužyć našym sapraŭdnym intaresam. Navat ujaviŭ dyjaloh u biełaruskim paviljonie na niejkaj navukovaj vystavie:
— Dobry dzień, tut pradstaŭleny apošnija navinki biełaruskaj navuki?
— Vełkom, huten tah, dobry dzień! Mahu prapanavać vam niekalki ekskluziŭnych raspracovak. Voś, naprykład, «zamiežnapalityčny prahmatyzatar»
— Heta ž pyłasos!
— Sami vy pyłasos! Pryłada pabudavana na pryncypie zaležnaści zamiežnaj palityki ad intensiŭnaści patokaŭ nejtronaŭ i pratonaŭ. Uklučajem prahmatyzatar u sietku. Adčuvajecie, jak prahmatyzujecca vaša zamiežnaja palityka ŭ radyjusie dvuch metraŭ? Možna pastavić na maksymum – dziesiać metraŭ. Na žal, heta pakul usio, adnak eksperymenty praciahvajucca.
— Dobra, a voś tam što? Chakiejnyja naplečniki?
— Heta «palityčny hibkatar» – nakładajecca voś tak na plečy. Kali niechta sprabuje palapać vas pa plačy, bje tokam, ilustrujučy słovy Baćki: «My ničoha nie rabili dziela palapvańnia pa plačy». Pahadziciesia, vielmi zručna.
Idziom dalej. Aha! «Antynackoŭščyk» Heta specyjalna dla sustrečaŭ z hramadzianami SND, kab, havoračy Jaho słovami, nia dać «nackavać druh na druha». Reč nakštałt namordnika. Hladzicie, ja nadzieŭ jaho, i ciapier, navat kali vy budziecie pradavać mnie haz pa 200 baksaŭ, mianie na vas nie nackavać. Nu što, vypisvać?
— Nie, dziakuj.
— Nu, tady vyklučna dla vas «hieapalityčny zacikaŭlivač»: šlacham šmatlikich eksperymentaŭ dakazana, što, kali ŭ takim skafandry i takich łastach pryjści na dyplamatyčny raŭt, vami zacikaviacca ŭsie prysutnyja. Heta nia ŭsio: kali vy nabyvajecie hieapalityčny zacikaŭlivač, to kampanija-vytvorca daje vam u padarunak pryładu – «antydvuchstandartny adekvatar». Voś bačycie hetuju pimpačku? Jana nazyvajecca «naša pazycyja pa pytańniach dvuchbakovaha supracoŭnictva u handlovaj i tranzytna-transpartnaj sferach». Kali krucić voś hetuju ručku, jana adekvatna padkarektujecca. Pahadziciesia, super.
Pačakajcie, kudy vy?.. Ja ž jašče nie pakazaŭ vam «farmiravalnik pazytyŭnaha imidžu», pabudavany pavodle pryncypu kavavarki! Dzivak!.. Što skazać – zastaŭsia ŭ minułym stahodździ.
