U vieraśnioŭskich rachunkach za pasłuhi kamunalnikaŭ niekatoryja žychary Frunzienskaha rajona Minska znajšli novy dla siabie punkt — adličeńni na strachavańnie kvater.
Strachavańnie dobraachvotnaje. Ale suma štomiesiačnaha strachavoha ŭniosku — 3375 rubloŭ — paznačanaja razam z koštami vyvazu śmiećcia, techničnaha absłuhoŭvańnia i inšych pasłuh kamunalnikaŭ. I tolki na advarocie tłumačycca dobraachvotny charaktar płaciažu. Maŭlaŭ, kali nie chočacie płacić, adminusujcie sami. A kali zapłacili, a damovy na strachavańnie nie majecie, hrošy pojduć kamunalnikam.
Sam fakt raźmiaščeńnia dobraachvotnaj pasłuhi razam z abaviazkovymi lohka moža uvieści ŭ zman.Asabliva starejšaje pakaleńnie. Jakoje pryvykła — raz u kvitancyi zapisana, treba płacić. I ludzi buduć płacić aŭtamatyčna — suma jak byccam i nievialikaja.
Dva bochany chleba možna nabyć na tyja niapoŭnyja try z pałovaj tysiačy. A ŭzamien abiacajecca šmat. Spakuślivyja ličby. Naprykład, suma vypłaty ŭ vypadku naniasieńnia škody dla kvatery składzie 15 młn rubloŭ. A ŭ jakaści takoj škody kampanija «Pramtransinviest», jakaja i zajmajecca novym vidam strachavańnia, bačyć nie tolki zvyčajnyja pobytavyja niepryjemnaści, ale navat i stychijnyja biedstvy. Možna pasprabavać atrymać kansultacyju ŭ samoj kampanii, źviarnuŭšysia pa paznačanym kruhłasutačnym numary.
Namieśnik dyrektara «Pramtansinviesta» pa pytańniach strachavańnia Tamara Karčeŭskaja ŭ razmovie z «NN» patłumačyła, što
vopyt dobraachvotnaha strachavańnia žylla byŭ pieraniaty ŭ Maskvie.Tam takim vidam strachavańnia zajmajucca piać roznych kampanij. A ŭ cełym jano achoplivaje amal pałovu nasielnictva rasijskaj stalicy. Spadarynia Karčeŭskaja taksama adznačyła, što novaŭviadzieńnie nie supiarečyć biełaruskamu zakanadaŭstvu. Pytańnie pa akazańni novaj pasłuhi papiarednie ŭzhadniałasia z «Minharvykankamam». Pierad uviadzieńniem dobraachvotnaha strachavańnia žylla dla ŭsiaho Minska u Frunzienskim rajonie stalicy byŭ papiarednie praviedzieny ekśpierymient. «Vyniki dla ludziej byli pazityŭnyja. My ŭžo pačali vypłaty pa strachavych vypadkach», — adznačaje T.Karčeŭskaja.
Kampanija «Pramtransinviest» zasnavanaja ŭ 1993 hodzie i pieršapačatkova zajmałasia strachavańniem avijacyjnaha transpartu. Vialiki šturšok dla raźvićcia «Pramtransinviest» atrymała ŭ 2004 hodzie, kali była ŭklučana ŭ śpis šaści strachavych kampanij, jakim dazvalałasia ŭdzielničać ŭ abaviazkovym strachavańni transpartnych srodkaŭ, što vyjazdžajuć za miežy Biełarusi. Mienavita «Pramtransinviest» zajmałasia strachavańniem biełaruskaha kaśmičnaha aparata — BiełKA.
Siarod akcyjanieraŭ kampanii možna znajści jak viadomyja biełaruskija pradpryjemstvy — jak «MTZ», «BiełAZ», «BMZ», «Biełpošta», tak i Kiraŭnictva spravaŭ kiraŭnika krainy.Što, mahčyma, dazvoliła «Pramtransinviestu» prajavić nastolki śmiełuju inicyjatyvu.
