U minułuju piatnicu Alaksandr Łukašenka abmiarkoŭvaŭ mahčymaść prodažu Minskaha hadzińnikavaha zavodu šviejcarskaj kampanii «Frank Miuler».
Ale, jak adznačaje BDH, damova z kampanijaj «Frank Miuler» vyklikaje bolš pytańniaŭ, čym adkazaŭ, bo ŭ šviejcarskaj presie firmie pradkazvajuć bankructva.
Kampanija «Frank Miuler» źjaviłasia ŭ 1991 hodzie. U 1990‑ia kampanija raźvivałasia vielmi paśpiachova: kolkaść vytvorčych cechaŭ pavialičvałasia, adčynialisia kramy pa ŭsim śviecie, raśli prybytki.
Pieršyja surjoznyja niepryjemnaści adbylisia na miažy 2003‑2004 hadoŭ.
U 2007 hodzie popyt na pradukcyju «Frank Miuler» zvaliŭsia na 25%, u 2008‑m — na 75%.
Ź viasny 2009 hoda kiraŭnictva kampanii pačało ładzić masavyja zvalnieńni piersanału: na vulicy apynulisia bolš 250 čałaviek.
Šviejcarski ŭpłyvovy ekanamičny časopis Bilan u vieraśniovym numary za hety hod paviedamlaje, što ciapier kampanija «Frank Miuler»
znachodzicca ŭ ciažkim finansavym stanoviščy, bo składskija zapasy pieravyšajuć hadavy abjom vytvorčaści, a abaviazak pa padatkovych płaciažach składaje 300 młn šviejcarskich frankaŭ.
Pamiž tym, pakul u Šviejcaryi naziralniki abmiarkoŭvajuć harotny stan kampanii, u Minsku jana zbrajecca kupić hadzińnikavy zavod za 10 młn dołaraŭ. Pradpryjemstva zajmaje pry hetym niekalki dziasiatkaŭ tysiač kvadratnych mietraŭ. Atrymlivajecca, što vielizarny budynak razam z prystojnym učastkam ziamli (30 hiektaraŭ) dastaniecca šviejcarskaj kampanii amal zadarma. Pa prybliznych raźlikach, u 10 raz mienš za tuju sumu, jakuju pavinien zapłacić fundatar, kuplajučy budynak Minskaha hadzińnikaha zavodu pa rynkavym košcie.
Jak by tam ni było, situacyja z namierami šviejcarskaha fundatara na biełaruskim napramku pavinna chutka prajaśnicca. Da 15 śniežnia «Frank Miuler» pavinien padać na stoł Alaksandru Łukašenka prajekty asnoŭnych dakumientaŭ.