Na partale Mižnarodnaha radyjo Kitaja (MRK) SRI‑Online adkryłasia biełaruskamoŭnaja staronka — belarusian.cri.cn
Jak paviedamiŭ 19 kastryčnika na pres‑kanfierencyi ŭ Minsku namieśnik hałoŭnaha redaktara MRK Iń Li, interniet‑staronka na biełaruskaj movie źjaŭlajecca «aknom dla znajomstva biełarusaŭ z Kitajem». Na sajcie raźmieščana samaja roznaja infarmacyja: naviny, źviestki ab kultury i turyźmie Kitaja, fotahalereja słavutych miaścin KNR. Akramia taho, naviedvalnikam prapanoŭvajucca ŭroki kitajskaj movy i interaktyŭnaja zona, u jakoj usie žadajučyja mohuć abmianiacca infarmacyjaj ab Kitai.
Stvareńnie interniet‑staronki na biełaruskaj movie padmacavana pratakołam namieraŭ ab supracoŭnictvie ŭ interniet‑śfiery pamiž Nacyjanalnaj dziaržaŭnaj teleradyjokampanijaj Biełarusi i Mižnarodnym radyjo Kitaja, jaki byŭ padpisany ŭ Minsku 19 kastryčnika. Dakumient praduhledžvaje abmien infarmacyjaj i aŭdyjoprahramami. Z nahody znamianalnych padziej i śviat Biełteleradyjokampanija i MRK buduć rychtavać śpiecyjalnyja prahramy i ŭ miežach abmienu tranślavać ich u efiry ci režymie anłajn.
Pratakoł namieraŭ ab supracoŭnictvie taksama praduhledžvaje abmien supracoŭnikami. Tak, u pryvatnaści, biełaruskija žurnalisty praviaduć u Kitai hod. Čakajecca, što ŭ Biełarusi taksama buduć stažyravacca supracoŭniki MRK. Akramia taho, dakumientam praduhledžana sumiesnaja arhanizacyja mierapryjemstvaŭ praź interniet.
Pasoł Kitaja ŭ Biełarusi Łu Hujčen vykazaŭ upeŭnienaść, što interniet‑staronka na biełaruskaj movie budzie «dobrym mostam, jaki zblizić narody i ŭmacuje duchoŭnuju i hramadskuju asnovu kitajskich i biełaruskich adnosin dvuchbakovaha supracoŭnictva i stratehičnaha ŭzajemadziejańnia».
Staršynia Biełteleradyjokampanii Alaksandr Zimoŭski ŭ svaju čarhu padkreśliŭ, što rašeńnie MRK ab stvareńni biełaruskamoŭnaj interniet‑staronki — heta znak surjoznaj pavahi. Pavodle słoŭ Zimoŭskaha, jon «padkreślivaje tuju stupień davieru i ŭzrovień supracoŭnictva, jakija zaraz isnujuć nie tolki pamiž Biełteleradyjokampanijaj i MRK, ale i KNR i Biełaruśsiu».
***
Mižnarodnaje radyjo Kitaja było stvorana ŭ 1941 hodzie z metaj pahłybić razumieńnie i siabroŭstva pamiž narodami Kitaja i ŭsiaho śvietu. Heta adzinaje ŭ KNR dziaržaŭnaje radyjo, jakoje ažyćciaŭlaje viaščańnie na zamiežnyja krainy. Prahramy MRK možna słuchać na 59 movach u abjomie 1 tys. 520 hadzin ŭ sutki.
Sajt MRK — CRI‑Online — byŭ adkryty ŭ 1998 hodzie. Siońnia na im publikujucca materyjały na 59 movach pa raździełach: naviny, ekanomika, kultura, hramadstva, padarožžy, sport, zabavy i inšaje.