Mieksikanskija śpiecsłužby 18 hadoŭ sačyli za nobieleŭskim łaŭreatam u halinie litaratury kałumbijcam Habryelem Harsija Markiesam.
Z 1967 pa 1985 hady aŭtaram ramanu «Sto hadoŭ adzinoty» viałosia skrytaje nazirańnie ŭ suviazi ź jaho levymi pohladami i blizkaściu da Fidela Kastra. Pra heta stała viadoma paśla taho, jak byli rassakrečanyja i apublikavanyja dakumienty Fiederalnaha ŭpraŭleńnia biaśpieki Mieksiki. Markies staŭ abjektam sačeńnia palityčnaj palicyi ŭ 1967 hodzie, kali praz pahrozy vymušany byŭ pakinuć Kałumbiju i pierajechać u mieksikanskuju stalicu.
Siarod abnarodavanych dakumientaŭ — tajnyja danosy ahientaŭ pra jaho sustrečy z eks‑prezidentam Francyi Fransua Miteranam, aktyvistami levych ruchaŭ krain Łacinskaj Amieryki, a taksama asiarodździem kubinskaha lidera Fidela Kastra.
Tak, u adnym z apublikavanych danosaŭ havorycca, što «Habryel Marsija Markies charaktaryzujecca prakubinskim i prasavieckim nastrojam i źjaŭlajecca ahientam kubinskaj vyviedki».
