U minskich aptekach brakuje nie tolki supraćvirusnych preparataŭ, ale navat i zvyčajnych marlevych paviazak.
Karespandent «NN» abyšoŭ čatyry apteki ŭ centry horada i paŭsiul sutyknuŭsia z adnolkavym vidoviščam — vialikija čerhi i rasčaravanyja adsutnaściu nieabchodnych preparataŭ pakupniki. Na pytańnie, kali ž buduć zaviezienyja chacia b marlevyja paviazki, farmaceŭty tolki paciskajuć plačyma i prapanujuć pryjści paźniej.
Zastajecca tolki zdahadvacca, kudy padzielisia maski. Na vulicach horada ludziej, jakija karystajucca hetym prostym srodkam, pakul vobmal.
***
U kancernie «Biełbijafarm» BiełaPAN paviedamili, što pradpryjemstvy, jakija padnačalenyja kancernu, nie vyrablajuć aksalinavuju maź i zaścierahalnyja maski.
Čamu nieabchodnyja leki nie zavoziacca ŭ dastatkovaj kolkaści ŭ krainu, u kiraŭnictvie RUP «Biełfarmacyja» admovilisia prakamientavać,
zajaviŭšy, što pa rastłumačeńni naležyć źviartacca ŭ Ministerstva achovy zdaroŭja. U samim viedamstvie na hety momant taksama kamientaryj atrymać nie ŭdałosia.
U biełaruskaj kampanii «Lekfarm», jakaja vyrablaje supraćvirusnyja leki «Arpietoł» (mižnarodnaja patentavanaja nazva — arbidoł), paviedamili, što ŭ bližejšyja niekalki hadzin hetyja leki pavinny źjavicca ŭ minskich aptekach.
Pavodle słoŭ dyrektara pradpryjemstva Siarhieja Błahavieščanskaha, pradpryjemstva adhruziła 40 tys. upakovak hetaha supraćvirusnaha srodku. Usiaho za sutki vypuščana 200 tys. upakovak, płanujecca vypuścić jašče 300‑500 tys. «Tak što ŭ bližejšy čas popyt pavinien być zadavoleny», — zapeŭniŭ Błahavieščanski.
Usie naviny na temu epidemii hrypu, parady, daviedki i žarty