Miedyki nastojvajuć na praciahu kanikuł u staličnych škołach da 15 listapada. Pra heta paviedamiła zahadčyca epidemijałahičnaha adździeła Minskaha haradskoha centra hihijeny i epidemijałohii Alena Fisienka.
Paśla vosieńskich kanikuł školniki pavinny byli pačać zaniatki 2 listapada. Adnak 31 kastryčnika ŭ suviazi z rostam zachvorvańnia na VRVI i hryp u Minsku było pryniata rašeńnie pradoŭžyć kanikuły da 6 listapada, a zatym — da 11 listapada ŭklučna.
Jak zajaviła Fisienka, u Minskim haradskim centry hihijeny i epidemijałohii padrychtavali abhruntavańnie nieabchodnaści praciahu kanikuł čarhovy raz. Pavodle raźlikaŭ śpiecyjalistaŭ, pradaŭžeńnie kanikuł da 11 listapada dazvoliła praduchilić bolš jak 15 tys. vypadkaŭ zachvorvańnia na VRVI i hryp siarod školnikaŭ.
Kali siarod darosłych uzrovień zachvorvańnia za apošnija dva tydni vyras u 2,5 razu, to siarod dziaciej — zastaŭsia na tym ža ŭzroŭni.
«Uličvajučy, što my znachodzimsia praktyčna na piku zachvorvańnia na VRVI i hryp, dzieciam ciapier za lepšaje zastavacca doma», — ličyć Fisienka.
Zahadčyca adździeła zajaviła, što za apošni tydzień situacyja z zachvorvańniem na hryp i VRVI ŭ Minsku niekalki stabilizavałasia. «Kali takaja tendencyja zachavajecca, to možna raźličvać, što na hetym tydni zachvorvańnie pačnie źmianšacca», — prahnazuje śpiecyjalist. Kali ž školniki zastanucca doma, vierahodnaść taho, što pačniecca źnižeńnie zachvorvańnia, bolš vysokaja.
Usiaho, pavodle źviestak Fisienki,
za apošni tydzień na VRVI i hryp zachvareła prykładna 65 tys. žycharoŭ stalicy.
9 listapada było pastaŭlena 12 tys. 175 takich dyjahnazaŭ, pryčym u 34% chvorych paćvierdžany hryp. Siarod zachvarełych na hryp za apošni tydzień 68% składajuć darosłyja.
«My možam mierkavać, što bolšaść vypadkaŭ hrypu — heta mienavita vypadki hetak zvanaha śvinoha hrypu, novaha virusa A (H1N1).Statystyka paćvierdžanych vypadkaŭ — inšaja, ale heta nie charaktaryzuje situacyju», — skazała jana.
Jak paviedamiła hałoŭny śpiecyjalist upraŭleńnia ideałahičnaj, sacyjalnaj i vychavaŭčaj pracy kamiteta pa adukacyi Minharvykankama Nadzieja Vialikaja,
pakul rašeńnie ab praciahu kanikuł dla minskich školnikaŭ treci raz nie pryniata, adnak hetaje pytańnie abmiarkoŭvajecca.
