Krychu bolš za miesiac tamu prachodziła infarmacyja, što žycharam vioski Krasnaje ŭ Maładziečanskim rajonie ŭdałosia adbicca ad pierśpiektyvy budaŭnictva ŭ ichniaj miascovaści sažałki-nazapašvalnika «adkidaŭ haspadarča-fiekalnych ściokavych vod», jakija chacieli pryvozić sa stalicy. Ludzi, piarečačy hetym płanam, sabrali kala tysiačy podpisaŭ.
Abmierkavańni pa pytańni budaŭnictva hetaj sažałki prajšli 30 sakavika ŭ Kraśnienskim domie kultury. Sustreča prajšła emacyjna, a 7 krasavika žychary Krasnaha pachvalilisia rašeńniem, padpisanym namieśnikam staršyni Maładziečanskaha rajvykankama Siarhiejem Bochanam i vyniesienym na padstavie «ahulnaha niehatyŭnaha ŭsprymańnia hramadskaściu budaŭnictva abjekta». Pavodle jaho, adpaviednaja kamisija rajvykankama pryznavała «niemahčymaść i niemetazhodnaść budaŭnictva sažałki z-za ekałahičnych, sacyjalna-ekanamičnych i inšych nastupstvaŭ».
Ludzi ščyra paradavalisia, ale ciapier stali padazravać, što rašeńnia hetaj kamisii moža być i niedastatkova.
Bo miesca mierkavanaha budaŭnictva na siońniašni dzień abharodžana i začyniena na zamok. I ludzi niepakojacca, što baraćbu za čystyja vadu, pavietra i hlebu im pryjdziecca pačynać spačatku.
Miascovyja žychary kažuć, što pa vioskach chodziać čutki, što «Minskvodakanał» nie źmiryŭsia z rašeńniem rajonnaj kamisii, vyniesienym na padstavie vynikaŭ hramadskaha abmierkavańnia, i što budzie ci to niejki sudovy razbor, ci to rašeńnie budzie prymać Minabłvykankam.
A aficyjnaha adkazu, u jakim čornym pa biełym vyrazna było b napisana, što ad budaŭnictva ŭ Minsku admovilisia, nichto nie daŭ i, jak vykazaŭsia adzin ź viaskoŭcaŭ, «nas pałochaje hetaja zahadkavaja cišynia».
Staršynia Kraśnienskaha sielskaha vykanaŭčaha kamiteta Valancina Kisiel taksama kaža, što maje zusim niašmat infarmacyi pa hetym pytańni. Čuła, adnak, što Minabłvykankam nibyta maje namier pryznačyć dadatkovuju ekałahičnuju ekśpiertyzu.
Žycharka pasiołka Čyść nakiroŭvała zapyty deputatu Pałaty pradstaŭnikoŭ i ŭ Kamitet dziaržaŭnaha kantrolu, ale tyja ich pierasłali ŭ Minharvykankam, a adtul adkaz, pavodle słoŭ pamočnicy deputata, nibyta dali, ale ludziam jaho nie pakazvajuć. Dziaržkantrol ža kaža źviarnucca paśla 17 maja.
Kali ŭsio ž taki adkaz ad čynoŭnikaŭ budzie taki, što ŭsio dobra i adstojnik možna budavać, to žychary viosak rychtujucca da dalejšaha zmahańnia, buduć źviartacca da Łukašenki.
U toj ža čas inžynier-hieołah ź vialikim dośviedam, ekśpiert pa ćviordych karysnych vykapniach Respublikanskaj kamisii pa zapasach Minpryrody Respubliki Biełaruś Ilja Karacienka acaniŭ, jakuju niebiaśpieku składaje dla miascovaha nasielnictva hety abjekt, kali jaho ŭsio ž buduć budavać:
«Kali sažałku-nazapašvalnik usio ž taki pabudujuć, to ŭ vypadku razryvu plonki, jakaja budzie vykładzienaja na jaho dnie dla strymlivańnia adkidaŭ, škodnyja rečyvy pratočacca ŭ padziemnyja vody praz porystyja parody, u tym liku piasok i hlinu, dalej — u raku Ušu i da vodazaboru «Krynica». U vyniku praź siem hadoŭ paśla taho, jak plonka parviecca, pałova Maładziečna ź jaho paŭnočnaha boku budzie z brudnaj vadoj».
Atrymać tłumačeńni ŭ «Minskvodakanała» redakcyi Kraj.by nie ŭdałosia: čynoŭniki ci nie brali trubku, ci pieranakiroŭvali adzin da druhoha. Tamu ŭviečary 2 maja redakcyja nakiravała «Minskvodakanału» pa elektronnaj pošcie aficyjny zapyt: «Prosim dać tłumačeńni, ci zakryta pytańnie ab budaŭnictvie abjekta. Kali nie, to na jakoj stadyi i ŭ jakich instancyjach znachodzicca razhlad hetaha pytańnia?»
Čytajcie taksama:
Pad Maładziečnam nie budzie schovišča fiekalnych adkidaŭ. Zdajecca, ludzi adstajali svajo
