U vypadku adličeńnia Taćciany Šapućki z BDU praź jaje ŭdzieł u forumie Uschodniaha partniorstva Leanid Kozik paabiacaŭ arhanizavać mitynh u jaje padtrymku.
U vypadku adličeńnia Taćciany Šapućki z BDU z‑za jaje ŭdziełu ŭ Forumie hramadzianskaj supolnaści prahramy «Uschodniaje partniorstva» ŭ Brusieli kiraŭnik Fiederacyi prafsajuzaŭ Biełarusi Leanid Kozik paabiacaŭ piersanalna arhanizavać mitynh u jaje padtrymku ŭ centry Minska. Pra heta paviedamiŭ lider mižnarodnaj arhanizacyi «Małady front» (Čechija) Źmicier Daškievič.
Taćciana Šapućka 16—17 listapada znachodzicca ŭ Bielhii i ŭdzielničaje ŭ forumie Uschodniaha partniorstva ad «Maładoha frontu».
«Adnak 16 listapada, u dzień adkryćcia forumu, adnakurśniki paviedamili joj, što jana moža być adličana ź jurydyčnaha fakulteta BDU.
Dekanat fakulteta pastaviŭ na asablivy ŭlik usiu hrupu, u jakoj vučycca Taćciana. Samu ž Taćcianu dekanat vyklikaŭ na śpiecyjalnaje pasiadžeńnie, jakoje pavinna prajści ŭ čaćvier, 19 listapada», — paviedamiŭ Daškievič.
Kali pra hetyja dziejańni dekanata stała viadoma biełaruskaj delehacyi na Forumie hramadzianskaj supolnaści, pradstaŭnik Jeŭrakamisii i maderatar biełaruskaj delehacyi Jaŭhieniuš Smolar zadaŭ pytańnie ab mahčymym adličeńni Šapućki staršyni FPB Leanidu Koziku.
«Na heta Kozik adkazaŭ, što ŭ vypadku adličeńnia Šapućki z VNU jon piersanalna arhanizuje manifiestacyju ŭ jaje padtrymku ŭ centry Minska», — paviedamiŭ Daškievič.
«My budziem spadziavacca, što Kozik nie admovicca ad svaich słoŭ, kali vierniecca ŭ Biełaruś, i Šapućka budzie praciahvać vučobu», — skazaŭ lider «Maładoha frontu».
