Jeŭrapiejski bank rekanstrukcyi i raźvićcia nabyŭ bolš za 25% akcyj hrupy kampanij West Ost Union, jakaja vałodaje najbujniejšaj u Biełarusi sietkaj supiermarkietaŭ dziciačych tavaraŭ.
Upieršyniu JEBRR inviestuje ŭ siektar roźničnaha handlu ŭ Biełarusi i treci raz za apošnija 10 hadoŭ układvaje srodki ŭ kapitał biełaruskich kampanij.
Jak adznačajecca ŭ pres-relizie JEBRR,
hrupa kampanij West Ost Union, zasnavanaja ŭ 2006 hodzie, vałodaje 12 supiermarkietami pad handlovaj markaj «Buślik». Mahaziny adkryty ŭ Minsku, Homieli, Breście i Mahilovie, a taksama ŭ niekatorych rajonnych centrach.
Čakajecca, što inviestycyi JEBRR zabiaśpiečać kampanii dadatkovy abarotny kapitał i buduć važnym krokam u realizacyi kampanijaj płanaŭ pa pašyreńni handlovaj sietki. West Ost Union płanuje adkryć 25 mahazinaŭ da 2013 hoda.
«Dalejšaje rehijanalnaje raźvićcio roźničnaj sietki «Buślik» daść dostup dla bolšaj kolkaści pakupnikoŭ siaredniaha ŭzroŭniu dachodaŭ da jakasnych tavaraŭ miascovaj i zamiežnaj vytvorčaści pa kankurentazdolnych cenach», — skazała staršy bankir JEBRR Irena Stenvieł. Pavodle jaje słoŭ, dasiahnieńni kamandy mieniedžmienta i prymianieńnie kampanijaj pieradavoj praktyki karparatyŭnaha kiravańnia byli važnym faktaram u pryniaćci bankam rašeńnia inviestavać u hety prajekt.
«Finansavańnie JEBRR dazvolić nam realizavać płany kampanii pa pašyreńni handlovaj sietki», — adznačyŭ hienieralny dyrektar West Ost Union Siarhiej Misiačenka, padkreślivajučy płany kampanii zaniać lidzirujučyja pazicyi ŭ roźničnym handli dziciačymi tavarami ŭ Biełarusi.
Mahaziny «Buślik» prapanoŭvajuć šyroki asartymient tavaraŭ dla dziaciej da 12 hadoŭ, uklučajučy dziciačaje charčavańnie, adzieńnie, abutak, cacki, padhuźniki i šmat inšaha. Nabyćcio 25,5% akcyj dazvolić pradstaŭniku JEBRR uvajści ŭ skład savieta dyrektaraŭ kampanii. Finansavyja detali ździełki nie raskryvajucca.
