U rajonnyja balnicy Homielskaj vobłaści pastupajuć na lačeńnie ź pnieŭmanijaj ad adnaho da 30 čałaviek u dzień.
Va ŭsich balnicach pieraprafilavany adździaleńni, vydzieleny reziervovyja łožki, miedustanovy zabiaśpiečany preparatami, u tym liku «Tamiflu». Pra heta paviedamlajuć pradstaŭniki miedustanoŭ.
Tak, u Mazyrskaj haradskoj balnicy paviedamili, što
na minułym tydni ŭ stacyjanar štodzionna pastupała da 30 čałaviek ź pnieŭmanijaj.
17 listapada špitalizavana 17 čałaviek. Dzieviać čałaviek znachodziacca ŭ reanimacyi, aparataŭ štučnaj vientylacyi lohkich chapaje. Dźvie žančyny pamierli ad pnieŭmanii. Hałoŭny lekar balnicy paviedamiŭ, što pa zahadzie Ministerstva achovy zdaroŭja pry lubym padazreńni na pnieŭmaniju pakazana špitalizacyja. «Tamiflu» pryznačajecca pry virusnaj pnieŭmanii ŭ chvorych. Pavodle słoŭ miedyka, balnica zabiaśpiečana nieabchodnymi dla lačeńnia preparatami.
U Pietrykaŭskaj rajonnaj balnicy paviedamili, što vypadki pnieŭmanii rehistrujucca čaściej, čym u epidemičny ŭzdym zachvorvańnia letaś. Na lačeńni ŭ balnicy z dyjahnazam «pnieŭmanija» znachodziacca 29 darosłych i čatyry dziciaci, dva čałavieki vypisalisia. Ad pnieŭmanii pamierła miascovaja žycharka, pryvatny pradprymalnik 49 hadoŭ. Razam z tym u balnicy adznačyli, što namieciłasia tendencyja da pamianšeńnia kolkaści pieršasnych chvorych na hryp i VRVI. Hałoŭny lekar balnicy padkreśliła, što va ŭstanovie niama niedachopu ŭ lekavych preparatach, «Farmacyja» svoječasova zabiaśpiečvaje ŭsim nieabchodnym dla lačeńnia. U chvorych brali proby na najaŭnaść virusu A (H1N1), ale pakul niama vynikaŭ, analiz pravodzić Homielski centr hihijeny i epidemijałohii.
U Chojnickaj rajonnaj balnicy z pačatku epidemičnaha ŭzdymu pastupili ź pnieŭmanijaj 22 darosłyja i 8 dziaciej, śmiarotnych zychodaŭ nie było.
20 chvorych na pnieŭmaniju pastupali ŭ Brahinskuju rajonnuju balnicu, adzin čałaviek znachodzicca ŭ reanimacyi. Hałoŭny ŭrač zajaviŭ, što lekami balnica zabiaśpiečana, preparat «Tamiflu» vypisany chvorym zhodna z pakazańniami.
Hałoŭny lekar Buda-Kašaloŭskaj rajonnaj balnicy adznačyŭ, što nazirajecca rost zachvorvańnia na pnieŭmaniju — pastupiła na lačeńnie 47 darosłych i 5 dziaciej. Lekar padkreśliŭ, što ŭsie chvoryja atrymlivajuć adekvatnaje lačeńnie, pry virusnaj pnieŭmanii pacyjentam pryznačajuć «Tamiflu».
Bolš za 50 čałaviek pastupała ź pnieŭmanijaj u Łojeŭskuju rajonnuju balnicu, bolš za 20 — u Naraŭlanskuju.
Infarmacyju ab zachvorvańni na pnieŭmaniju ŭ rehijonie ŭ cełym i ŭ Homieli ŭ pryvatnaści vyśvietlić nie ŭdajecca — kiraŭnictva abłasnoha ŭpraŭleńnia achovy zdaroŭja kateharyčna admaŭlajecca ad znosinaŭ z presaj.
