Viečaram 19 listapada prezident Paŭdniovaj Asiecii Eduard Kakojty pryniaŭ delehacyju biełaruskich deputataŭ na čale z namieśnikam staršyni kamisii pa mižnarodnych spravach i suviaziach z SND Uładzimiram Kužanavym.
Pra heta paviedamlaje pres‑słužba Ministerstva druku i masavych kamunikacyj Paŭdniovaj Asiecii.
«Chaču vykazać vam słovy ŭdziačnaści za vašu inicyjatyvu naviedać Paŭdniovuju Asieciju dla taho, kab aznajomicca z tymi padziejami, što adbyvalisia tut, — skazaŭ Kakojty. — Nas źviazvaje praciahłaja družalubnaja historyja.
U nas šmat ahulnaha i ŭ kultury, i ŭ tradycyjach, i ŭ viery.
Ale my cudoŭna razumiejem i toje stanovišča, u jakim apynułasia Biełaruś, kali ŭsie čakajuć vašaha rašeńnia. Ale heta ŭnutranaja sprava žycharoŭ i kiraŭnictva Respubliki Biełaruś».
Prezident Paŭdniovaj Asiecii padkreśliŭ, što hety praces nie pavinien farsiravacca. «Vy sami pavinny pryjści da hetaha rašeńnia», — zajaviŭ jon. «Samaje hałoŭnaje, kab budavalisia narmalnyja adnosiny ŭ ekanamičnaj śfiery, u kulturnaj śfiery. Tady i vyniki buduć adpaviednyja», — zaznačyŭ Kakojty.
Pavodle jaho słoŭ, Paŭdniovuju Asieciju i Biełaruś źviazvajuć «braterskija, siabroŭskija adnosiny».
«Vy sami vyznačycie, kali treba heta (pryznavać niezaležnaść) rabić.
Hałoŭnaje — naładzić mižparłamienckaje supracoŭnictva i supracoŭnictva na ŭzroŭni kiraŭnictva respublik. Formy pryznańnia taksama byvajuć roznyja, ale my, viadoma ž, budziem čakać aficyjnaha pryznańnia. Dla našaha naroda heta pryncypova važna», — padkreśliŭ Kakojty.
U svaju čarhu, Uładzimir Kužanaŭ zaznačyŭ, što vyniki vizitu ŭ Paŭdniovuju Asieciju buduć daviedzieny da kiraŭnictva Biełarusi. «Paśla viartańnia my padrychtujem hruntoŭny dakład i paviedamim kiraŭnictvu pra toje, što tut ubačyli. My chočam vykazać słovy ŭdziačnaści ŭsim, chto siońnia z nami pracavaŭ. Nas nie abmiažoŭvali ni ŭ čym, što chacieli — my ŭbačyli, što chacieli — my pačuli.
Biez uzdryhu ŭ hołasie i ŭ sercy hladzieć na ŭsio heta niemahčyma», — skazaŭ jon.
Jak raniej paviedamlałasia, z 17 pa 20 listapada delehacyja Pałaty pradstaŭnikoŭ i Savieta Respubliki naviedvaje Hruziju, Abchaziju i Paŭdniovuju Asieciju.
