2 śniežnia adkryty ŭčastak aŭtamabilnaj darohi R‑58 Minsk — Kałačy — Miadzieł na abjeździe vioski Dubaŭlany.
Jak paviedamlaje pres‑słužba departamienta «Biełaŭtadar» Ministerstva transpartu i kamunikacyj, budaŭnictva hetaha ŭčastka darohi daŭžynioj 4,6 km ažyćciaŭlałasia za košt srodkaŭ respublikanskaha darožnaha fondu. Jano było raspačata ŭ studzieni minułaha hoda i skončana ŭ listapadzie hetaha. Košt budaŭnictva abjekta ŭ dziejnych cenach składaje 41,1 młrd. rubloŭ.
Aŭtamabilnaja daroha sprajektavana pa novym napramku, maje čatyry pałasy ruchu. Pry budaŭnictvie ŭličvalisia jeŭrapiejskija patrabavańni da nahruzak na adzinočnuju voś aŭtamabila (11,5 tony).
Na darozie pabudavana transpartnaja raźviazka typu «romb» na pierasiačeńni z aŭtamabilnaj darohaj N‑9031 Kałodziščy — Zasłaŭje, pabudavany dva puciepravody daŭžynioj 52 i 55 mietraŭ.
U prajekcie taksama ŭličany patrabavańni da zabieśpiačeńnia narmalnych umoŭ dla pasažyraŭ i arhanizacyi aŭtobusnaha ruchu: pabudavany piać aŭtobusnych prypynkaŭ i piać aŭtapaviljonaŭ z prymianieńniem sučasnych kanstruktyŭnych rašeńniaŭ i architekturnaha afarmleńnia.
U metach arhanizacyi biaśpieki darožnaha ruchu vyklučany levyja pavaroty i zroblena barjernaja aharodža na raździalalnaj pałasie na ŭsim praciahu ŭčastka darohi. Dla arhanizacyi biaśpieki piešachodaŭ u rajonie transfarmatarnaj padstancyi «Paŭnočnaja» ŭ vioscy Dubaŭlany pabudavany piešachodny tunel.
Narmalnyja ŭmovy pražyvańnia miascovaha nasielnictva zabiaśpiečvajucca za košt naładžvańnia ŭzdoŭž žyłoj zabudovy ŭ rajonie padstancyi «Paŭnočnaja» šumazaścierahalnaha ekrana.
