Minsk patrabuje ad Maskvy zachavać nizkuju canu na haz u 2010 hodu, adnak «Hazprom» pakul nie maje namieru iści na sastupki. Pra heta vydańniu «Kommiersant'» paviedamiła blizkaja da pieramoŭ krynica ŭ rasijskaj kampanii.
Jak užo paviedamlałasia, rabočaja sustreča staršyni praŭleńnia AAT «Hazprom» Alaksieja Milera i pieršaha vice‑premjera Biełarusi Uładzimira Siamaški adbyłasia ŭ Maskvie 2 śniežnia. Pavodle infarmacyi pres‑słužby «Hazproma», baki abmierkavali papiarednija vyniki pracy ŭ 2009 hodzie ŭ śfiery pastavak i tranzitu hazu, a taksama pytańni dalejšaha supracoŭnictva. Padrabiaznaści pieramoŭ nie paviedamlajucca.
«Spadar Siamaška ŭžo nie raz zajaŭlaŭ pra nieabchodnaść zachavać nizkija ceny na haz dla Biełarusi i padkreślivaŭ, što ŭrad Rasii adkładvaje ŭviadzieńnie roŭnadachodnych cen na ŭnutranym rynku (pavinna było adbycca ŭ 2011 hodzie), a Minsk i Maskva źjaŭlajucca sastaŭnymi častkami sajuznaj dziaržavy. Nieaficyjna ŭ «Hazpromie» patłumačyli, što supiarečnaści ŭčora źniać nie ŭdałosia», — piša siońnia «Kommiersant'».
«My razumiejem, što biełaruski ŭrad choča padtrymać ekanomiku svajoj krainy za košt zachavańnia nievysokich cen na haz, tamu jany sprabujuć łabiravać panižalnyja kaeficyjenty i na nastupny hod,— pryvodzić «'» słovy krynicy. — Siaredniaja cana 2009 hoda dla Biełarusi składaje $146 za tysiaču kubamietraŭ, na 2010 hod — $164 pa formule cany. Niaznačny rost na 16% my ličym prymalnym. I naša pazicyja pa dadzienym pytańni niaźmiennaja».
Pavodle słoŭ pradstaŭnika «Hazproma», jašče adnym sprečnym momantam źjaŭlajucca ceny na haz u samoj Biełarusi.
«Sprava ŭ tym, što ŭłady krainy dazvalajuć «Biełtranshazu», jaki pradaje haz «Hazproma» ŭ Biełarusi, ustanaŭlivać siaredniehadavuju nacenku nie bolš za $10—12 za tysiaču kubamietraŭ, — zaŭvažyŭ jon. — «Hazprom» ža choča pavialičyć dachodnaść «Biełtranshaza», u jakim pavinien u 2010 hodzie atrymać 50%, i ŭstanaŭlivać nacenku pakvartalna».
Pavodle mierkavańnia šerahu ekśpiertaŭ, va ŭmovach surjoznych imidžavych strat ad hazavaj vajny z Ukrainaj i dla zachavańnia tranzitu «Hazprom» pojdzie na niekatoryja ŭstupki Minsku.
«Adterminoŭka pierachodu Rasii na roŭnadachodnyja ceny daje Minsku prava dabivacca taho ž dla Biełarusi, — cytuje «'» ekśpierta maskoŭskaj inviestycyjnaj kampanii «Trojka Dyjałoh» Valeryja Nieścierava. — I z‑za asablivaściaŭ hetaha hoda, kali padajučyja dachody «Hazproma» ad ekspartu składuć $25 młrd., manapolii daviadziecca prykłaści namahańni dla zachavańnia svajho imidžu stabilnaha pastaŭščyka i zapłacić za adsutnaść prablem z tranzitam», — ličyć analityk.
Namieśnik ministra enierhietyki Rasii Anatol Janoŭski paviedamiŭ «'», što rychtujecca prahrama doŭhaterminovaha supracoŭnictva Rasii i Biełarusi pa paliŭna‑enierhietyčnym kompleksie.
Dakumient dapracavany na 95% i pavinien być padpisany ŭ bližejšyja dva tydni. Klučavoje miesca ŭ im adviedziena ŭzajemaadnosinam bakoŭ pa hazie i nafcie. Z boku Rasii za padrychtoŭku prahramy adkazvaje vice‑premjer Ihar Siečyn, z boku Biełarusi — Uładzimir Siamaška.
