Jakija kampjutarnyja zabaŭki raspracoŭvajuć biełaruskija kampanii? Piša Jahor Marcinovič.
Kampjutarnyja hulni — nie tolki zabaŭka dla padletkaŭ. Heta i pakazčyk techničnaha raźvićcia krainy. Nadzvyčaj składany typ prahram — śviedčańnie vysokaha ŭzroŭniu kampjutaryzacyi.
A histaryčnyja hulni majuć istotny ideałahičny składnik. Kali bolšaść prahram raspracoŭvałasia na Zachadzie, amal kožny bandyt u ich akazvaŭsia «błahim chłopcam z Rasii». A ŭ rasijskich hulniach padletkam prapanujecca dapamahčy niepieramožnaj rasijskaj armii pastavić na kaleni Jeŭropu.
Druhaja suśvietnaja — naša ŭsio
U Biełarusi bolš za dva dziesiatki kampanij, jakija śpiecyjalizujucca na stvareńni hulniaŭ. Bolšaść raspracoŭvaje «kazualnyja» prahramy, razabracca ŭ jakich nieskładana i školniku, i chatniaj haspadyni.
Najbujniejšaja kampanija — «Hiejmstrym» — śpiecyjalizujecca na bolš składanych prajektach. Jana pracuje ŭ ramkach Parka vysokich technałohij i ŭžo vyjšła na mižnarodny ŭzrovień, zaklučajučy damovy to z rasijskimi, to ź japonskimi kalehami.
Samaja viadomaja biełaruskaja hulnia — «Apieracyja «Bahracijon», jakaja była pryznanaja najlepšaj kampjutarnaj stratehijaj na postsavieckaj prastory ŭ 2008 hodzie. Ministerstva adukacyi navat rekamiendavała vykarystoŭvać jaje na ŭrokach. Uchvaliła i Administracyja prezidenta. Praŭda, čynoŭniki nie ŭličyli, što ŭ hulni možna vajavać i za niemcaŭ… I z tym ža pośpiecham pieramahčy.
Małpy, miadźviedzi i ŭsie‑ŭsie‑ŭsie
Jość u Biełarusi kampanija, Steel Monkeys («Stalnyja małpy») — stvaralnik honačnych hulniaŭ i «stralałak». Biełarusy prykłali ruku i da papularnaha cykłu ofisnych hulniaŭ Moorhuhn. U ajčynnaj častcy hulni kuryca spaborničaje z astatnimi hierojami ŭ honkach. Hałoŭny ž prajekt Steel Monkeys — kryminalnaja drama z žyćcia Łas‑Viehasa. Jana stvarajecca piaty hod.
Biełaruskaja kampanija Aliasworlds raspracoŭvała sieryju hulniaŭ pra pryhody miedźviedzianiaci Śniažka. Jość i firmy, jakija raspracoŭvajuć hulni dla mabilnikaŭ. Tolki voś uvahi da biełaruščyny i ŭ ich nie nazirajecca.
Metavaja aŭdytoryja nie tut
Dyrektar «Hiejmstryma» Ivan Michnievič zaŭvažaje: «Metavaja aŭdytoryja našych hulniaŭ znachodzicca ŭ zachodnich krainach, tamu pradukty buduć vychodzić pa‑anhlijsku». Pakolki biełaruski rynak nievialiki, hulni, jakija raspracoŭvajucca ŭ našaj krainie, vydajucca pieravažna ŭ Rasii. A pakolki zamiežnikam nie nadta cikavaja biełaruskaja historyja, i kampjutarnych hulniaŭ pa jaje matyvach mała. Vyklučeńnie stvaraje chiba Druhaja suśvietnaja vajna.