U studzieni—kastryčniku 2009 hoda salda vonkavaha handlu tavarami i pasłuhami pa mietadałohii płaciežnaha bałansu skłałasia admoŭnaje ŭ sumie 4 młrd. 308,6 młn. dalaraŭ, paviedamlaje Nacyjanalny statystyčny kamitet.
Zhodna z prahnozam sacyjalna‑ekanamičnaha raźvićcia, pa vynikach 2009 hoda admoŭnaje źniešniehandlovaje salda nie pavinna pieravysić 1,5 młrd. dalaraŭ.
Pavodle mietadałohii handlovaha bałansu, jakaja ŭličvaje danyja Dziaržaŭnaha mytnaha kamiteta, u studzieni—kastryčniku 2009 hoda admoŭnaje salda vonkavaha handlu tavarami sfarmavałasia ŭ pamiery 5 młrd. 731,5 młn. dalaraŭ (u studzieni—kastryčniku 2008 hoda — minus 4 młrd. 956,7 młn.).
Asnoŭnaj krynicaj farmavańnia admoŭnaha salda vonkavaha handlu tavarami Biełstat nazyvaje ekspartna‑impartnyja apieracyi z pramiežkavymi tavarami
(enierhanośbity, syravina, materyjały i kamplektujučyja). Za studzień—kastryčnik 2009 hoda ŭ krainu ŭvieziena pramiežkavych tavaraŭ na 16,6 młrd. dalaraŭ (na 35% mienš, čym za taki ž pieryjad 2008 hoda). Ekspart pramiežkavych tavaraŭ skłaŭ 11,9 młrd. dalaraŭ, što na 44% mienš za ŭzrovień anałahičnaha minułahodniaha pieryjadu.
Bolš za 50% vartasnaha abjomu ekspartu i impartu pramiežkavych tavaraŭ składajuć enierhietyčnyja tavary. Na źniešni rynak ich pastaŭlena na 6 młrd. 104,9 młn. dalaraŭ, što na 42,3% mienš, čym u studzieni—kastryčniku 2008 hoda. Impart enierhietyčnych tavaraŭ skłaŭ 8 młrd. 954,4 młn. dalaraŭ, skaraciŭšysia na 26,8%. Salda vonkavaha handlu enierhanośbitami skłałasia admoŭnaje ŭ pamiery 2 młrd. 840,5 młn. dalaraŭ, što na 889,5 młn. bolš za pakazčyk u studzieni—kastryčniku 2008 hoda.
Vieličynia admoŭnaha salda handlu spažyvieckimi tavarami ŭ studzieni—kastryčniku 2009 hoda pamienšyłasia na 655,1 młn. dalaraŭ u paraŭnańni z takim ža minułahodnim pieryjadam i skłała minus 213,6 młn. dalaraŭ.
Farmavańnie admoŭnaha salda vonkavaha handlu spažyvieckimi tavarami abumoŭlena vynikam ekspartna‑impartnych apieracyj pa niecharčovaj hrupie tavaraŭ.
Vieličynia admoŭnaha salda pa hetaj hrupie skłała 731,6 młn. dalaraŭ, u studzieni—kastryčniku 2008 hoda — 1 młrd. 63,7 młn. dalaraŭ. Značna skaročany pastaŭki na źniešni rynak mebli (na 152,2 młn. dalaraŭ), chaładzilnikaŭ i marazilnikaŭ (na 107,2 młn. dalaraŭ), plitki kieramičnaj (na 41,8 młn. dalaraŭ).
Źniešni handal charčovymi tavarami ŭ studzieni—kastryčniku 2009 hoda charaktaryzavaŭsia dadatnym značeńniem salda, vieličynia jakoha skłała 518 młn. dalaraŭ. U paraŭnańni z adpaviednym minułahodnim pieryjadam jana pavialičyłasia na 323 młn. dalaraŭ, ci ŭ 2,7 razu.
