16 śniežnia Biełaruskaja respublikanskaja navukova‑mietadyčnaja rada pa pytańniach historyka‑kulturnaj spadčyny pry Ministerstvie kultury adchiliła eskizny prajekt prystasavańnia haspadarčaha dvara Łošyckaj siadziby ŭ Minsku pad haściničny kompleks.
Pra heta paviedamiŭ staršynia Biełaruskaha dobraachvotnaha tavarystva achovy pomnikaŭ historyi i kultury Anton Astapovič.
Pavodle jaho słoŭ, prajekt uźviadzieńnia čatyrochzorkavaha dvuchpaviarchovaha z mansardaj hatela, prapanavany minskim architektaram UP «Łanterna» Uładzimiram Hałkoŭskim (zakazčyk — KUP «Biźniescentr «Stalica»), nie adpaviadaje ahulnapryniatym mietodykam i dziejučamu zakanadaŭstvu ŭ halinie achovy historyka‑kulturnaj spadčyny.
Jak rastłumačyŭ Astapovič,
aŭtary prajekta prapanavali pabudavać hatel na asnovie zachavanych pramysłovych budynkaŭ Łošyckaj siadziby — śpirtaschovišča i karpusoŭ brovarnaha zavoda XVIII—XIX stahodździaŭ.
«Adnak realizacyja hetaha prajekta razburyć składzienuju abjomna‑płanirovačnuju kampazicyju kompleksu», — skazaŭ Astapovič.
Pavodle jaho słoŭ, rada prapanavała prajekciroŭščykam dapracavać prajekt z ulikam bieražlivaha staŭleńnia da budynkaŭ śpirtaschovišča i brovaru.
***
Pomnik architektury nacyjanalnaha značeńnia XIX stahodździa ŭ styli eklektyki Łošyckaja siadziba źjaŭlajecca centram siadzibna‑parkavaha kompleksu XVIII—XIX stahodździaŭ, raźmieščanaha na paŭdniovym uskrajku Minska ŭ źlićci rek Śvisłač i Łošyca. Siadziba staić na hrebni pojmiennaj terasy, maje asimietryčnuju abjomna‑prastoravuju kampazicyju, składajecca z draŭlanaha adnapaviarchovaha i prybudavanaha da jaho starčaka cahlanaha dvuchpaviarchovaha abjomaŭ. U dekaratyŭnym afarmleńni fasadaŭ vykarystany draŭlanyja raźbianyja detali, u tym liku słupy hałoŭnaha ŭvachodu, akonnaja šaloŭka i karniznyja pajasy. U interjery zachavalisia lapnyja detali, ablicoŭvańnie ścien dubovymi panielami i kalarovyja kafli.
U piśmovych krynicach pieršaje zhadvańnie siadziby datujecca kancom XVI — pačatkam XVII stahodździa. U hetym domie ŭ svoj čas pabyvali mnohija viadomyja dziejačy ajčynnaj kultury, u tym liku kłasik biełaruskaj litaratury Vincent Dunin‑Marcinkievič.