Papu Bieniedyktu XVI pieradadziena aficyjnaje zaprašeńnie naviedać Biełaruś ad Kanfierencyi katalickich biskupaŭ u Biełarusi i Biełaruskaj rymska‑katalickaj carkvy (BRKC). Jaho pieradali 17 śniežnia biełaruskija biskupy padčas svajho vizitu ŭ Vatykan.
Jak paviedamipres‑sakratar BRKC ksiondz Alaksandr Amialčenia, u kancy vizitu šaści biełaruskich biskupaŭ u apostalskuju stalicu ich «sardečna i pa‑baćkoŭsku» pryniaŭ pantyfik. Jon uručyŭ biskupam svajo pasłańnie pa vynikach sustreč ijerarchaŭ BRKC u kanhrehacyjach i savietach Vatykana, a taksama asabistych aŭdyjencyj biskupaŭ u pantyfika. Pavodle słoŭ ksiandza Alaksandra, tekst pasłańnia budzie apublikavany najbližejšym časam. Asablivaja ŭvaha ŭ im nadajecca nieabchodnaści raźvićcia ekumieničnaha dyjałohu rymska‑katalickaj carkvy ź inšymi chryścijanskimi kanfiesijami, u pieršuju čarhu z pravasłaŭnaj carkvoj.
Pres‑sakratar adznačyŭ, što piersanalnyja sustrečy biełaruskich biskupaŭ ź Bieniedyktam XVI prajšli ŭ ciopłaj i siabroŭskaj atmaśfiery. Jany pakazali, što pantyfik vielmi dobra viedaje biełaruskuju tematyku i prablemy dziejnaści BRKC, hłyboka vałodaje infarmacyjaj ab situacyi ŭ Biełaruskaj rymska‑katalickaj carkvie i biełaruskim hramadstvie ŭ cełym.
Vizit da apostalskich parohaŭ biełaruskich biskupaŭ u Vatykan prachodziŭ z 11 pa 17 śniežnia. Uviečary 18 śniežnia ijerarchi BRKC pavinny viarnucca na radzimu.