Skrynšot videa ŭ instahramie lolly_ly
— Nie piła, nie paliła, vykonvała ŭsie rekamiendacyi žanočaj kansultacyi, pryjšła ŭ radzilniu ŭ pryznačany dzień, — kaža žančyna na videa, jakoje niadaŭna źjaviłasia ŭ instahramie.
Dla 31-hadovaj Kaciaryny Sucharukavaj heta była pieršaja ciažarnaść, jana praciakała biez uskładnieńniaŭ. Rody nie pačalisia sami, tamu žančyna pryjechała ŭ radzilniu ŭ dzień, jaki byŭ pryznačany joj dla płanavaj špitalizacyi — 15 studzienia. Termin ciažarnaści składaŭ 41 tydzień i 1 dzień, płod byŭ davoli vialikim — bolš za 4 kiłahramy. Adnak paradzisie skazali, što pakazańniaŭ dla kiesarava siačeńnia niama.
Na praciahu dvuch dzion miedyki sprabavali stymulavać pačatak rodaŭ śpiecyjalnymi tabletkami, ale heta nie spracavała. Tady žančynie prapanavali stymulavać radavy praces śpiecyjalnym hielem. Jana pahadziłasia, ale ŭ chutkim časie paškadavała pra heta rašeńnie. Mocnyja schvatki (takija, jakija byvajuć pry naturalnym pracesie ŭ samym kancy rodaŭ) pačalisia praktyčna adrazu ž.
— Kala 14:30 ja litaralna valałasia na padłozie. Kardyjatakahrafiju zapisvali ź ciažkaściu, ad siły chvilin 10. Ja dakładna pamiataju, što ŭ małyški była tachikardyja. Mnie kazali, što heta narmalna. Praktyčna da samaha kanca rodaŭ dzicia nie apuskałasia ŭ radavyja šlachi. Choć dzicia sprabavali apuścić, akušerka cisnuła mnie na žyvot. My tak i nie zrazumieli, apuściłasia ŭ vyniku małyška ŭ taz ci nie.
Praź niekalki hadzin miedyki pabačyli zialonyja vody. Ale i ŭ hety momant nie stali rabić žančynie kiesarava. Bližej da nočy schvatki stali zhasać, vyciahvać dzicia pryjšłosia vakuumam. Niemaŭla nie zapłakała.
— Zahadčyk radzilnaha błoka skazaŭ, što tonus dobry, chacia dziciačy reanimatołah skazaŭ, što ničoha dobraha niama. Dzicia adrazu stali reanimavać. Małyška paśpieła raspluščyć i zapluščyć vočki. A 3-j hadziny nočy mnie paviedamili ab kryvacioku ŭ lohkim. Paźniej było spynieńnie serca — jaho ŭdałosia zapuścić. Druhoje spynieńnie serca, jana, na žal, nie pieražyła. Dzicia było poŭnaściu na aparacie, patrabavałasia 99% kisłarodu. U mianie adno pytańnie: kali ŭsio było ŭ paradku, dyk čamu taki vynik? Čamu nie było pierahladu ŭ bok kiesarava siačeńnia? Upeŭniena, dzicia było b žyvoje.
Dačku, jakaja pražyła ŭsiaho niekalki hadzin, žančyna nazvała Vasilisaj. Pryčynaj jaje śmierci paznačana ciažkaja aśfiksija — kažučy prostaj movaj, dziaŭčynka doŭha była biez kisłarodu.
U kamientaryjach da videa niekatoryja žančyny pišuć, što taksama sutykalisia z admovaj rabić kiesarava ŭ biełaruskich radzilniach, z-za čaho ŭ dziaciej była aśfiksija roznaj stupieni. U najlepšym vypadku potym dziciaci patrabavałasia praciahłaja reabilitacyja.
Raniej supracoŭnica adnaho ź biełaruskich radzilnych damoŭ kamientavała «Našaj Nivie» žudasny vypadak u Salihorsku, dzie ŭ anałahičnaj situacyi (uračy nie stali svoječasova zrabić kiesarava) niemaŭla atrymała ciažkuju aśfiksiju i trapiła ŭ reanimacyju.
Tady ekśpiertka raspaviała, što nasamreč takija vypadki, na žal, nie adzinkavyja. A pryčyna trahiedyj hučyć cynična i žudasna — uračy nie chočuć sapsavać statystyku pa kolkaści kiesarava.
Ministerstva achovy zdaroŭja Biełarusi patrabuje pravodzić kiesarava nie bolš čym u 30% vypadkaŭ (a lepiej, kab hety pracent va ŭstanovie achovy zdaroŭja byŭ jašče nižejšy) — heta ŭstanoŭka na ŭzroŭni načmiedaŭ, hałoŭnych daktaroŭ. Surazmoŭca padkreślivała: kali pracent značna pieravyšaje «normu», tady dastajecca ŭsim u radzilni.
U dziaržaŭnych ŚMI źviartajuć uvahu, što ŭ Jeŭropie častata kiesaravych siačeńniaŭ dachodzić da 50%, u Łacinskaj Amierycy navat da 60%, zatoje ŭ Biełarusi — kala 31%.
Čytajcie taksama:
