9 studzienia ŭ Minsku na 85–m hodzie žyćcia pamior probašč kaścioła śviatoj Hanny ŭ Mosary Hłybockaha rajona Viciebskaj vobłaści Juozas Bulka.
La chaty ŭ Mosary, žnivień 2009 hoda.
Ksiondz Bulka błasłaŭlaje dzicia.
Mosar na vačach staŭ turystyčnaj stalicaj Hłyboččyny.
Pavodle infarmacyi pres–słužby rymska–katalickaha kaścioła ŭ Biełarusi, ksiondz Bulka pamior 9 studzienia ŭ adnoj z staličnych klinik paśla paŭtornaj apieracyi na sercy, praviedzienaj 7 studzienia.
Pachavańnie Juozasa Bulki adbuducca 11 studzienia ŭ Mosary. Imša pačniecca ŭ 11.00.
Bolš za 25 hadoŭ ksiondz Bulka słužyŭ u prychodzie Mosar Viciebskaj dyjacezii.
Jon staŭ šyroka viadomy ŭ Biełarusi i za jaje miežami jak prapahandyst zdarovaha ładu žyćcia.
Pa inicyjatyvie ksiandza ŭ Mosary stvorany antyałkaholny muziej i Aleja ćviaroźnikaŭ, jakuju zakłali pradstaŭniki kłubaŭ ananimnych ałkaholikaŭ ź Biełarusi, Łatvii i Litvy. Dziakujučy śviataru mnohija žychary Mosar i navakolnych viosak pierastali złoŭžyvać ałkaholem.
U červieni 2009 Juozas Bulka źviarnuŭsia da ŭładaŭ z prośbaj zabaranić prodaž ałkaholu ŭ Mosary. Jon taksama zajaviŭ, što pierad svaim sychodam na piensiju vosieńniu 2009 hoda maje namier abviaścić Mosar zonaj ćviarozaści. Paśla vychadu na piensiju ksiondz mieŭ pierajechać u dom dla sastarełych, adnak zatym pieradumaŭ. «Parafijanie mianie nie vyhaniajuć i nie adpuskajuć z kaścioła, – skazaŭ Bulka. – Ja vyrašyŭ zastacca i dapamahać novamu probašču ksiandzu Uładzimiru Šynkoviču, jaki pakul słužyć u vioscy Idołta Miorskaha rajona Viciebskaj vobłaści».
Juozas Bulka mnohaje zrabiŭ dla dobraŭparadkavańnia Mosara. Pa jaho inicyjatyvie ŭ vioscy stvorany Kryžovy šlach, stadyjon, strausinaja fierma, dendrapark z krynicami, fantanami i skulpturami, pierad kaściołam sv. Hanny uźviedzieny pomnik Janu Paŭłu II.
U 2005 hodzie Juozas Bulka staŭ pieršym biełaruskim ksiandzom, udastojenym łukašenkaŭskaj premii «Za duchoŭnaje adradžeńnie»,
a ŭ 2006 hodzie ŭkazam prezidenta byŭ uznaharodžany miedalom Francyska Skaryny za padźvižnickuju dziejnaść pa ŭmacavańni duchoŭnych kaštoŭnaściaŭ i prapahandzie zdarovaha ładu žyćcia.
U toj ža čas apošnija hady jahonaha žyćcia byli azmročany pryvidami ź minułaha.
U kastryčniku 2008 hoda prakuratura Litvy vydała order na aryšt Juozasa Bulki i abviaściła jaho ŭ vyšuk pa abvinavačvańni ŭ hienacydzie.
Pa viersii litoŭskich prakuroraŭ, u pačatku 1950-ch hadoŭ Bulka supracoŭničaŭ z kamunistyčnymi ŭładami, dapamahajučy im vysočvać i zabivać partyzan, jakija vajavali suprać savieckaj ułady.
Ksiondz Bulka reahavaŭ na źvinavačvańni ŭchilista i admoviŭsia źjaŭlacca ŭ Litvu na sud. «Mnie nie mohuć prabačyć, što ja – litoviec – žyvu ŭ Biełarusi, słužu tut Bohu i stvaryŭ u hetaj krainie takuju pryhažość, a taksama z małych hadoŭ viedu aktyŭnuju baraćbu z ałkahalizmam», – skazaŭ Bulka.
«Kali ja vinavaty, to kajusia», – padkreśliŭ śviatar.
