Fota: It's my City
Jekaciarynburhskaha pijarščyka Jarasłava Šyršykava pryhavaryli da dvuch hadoŭ kałonii za dopis ab zabojstvie Uładlena Tatarskaha, piša «Mieduza».
Šyršykava vinavacili ŭ «apraŭdańni teraryzmu». U dopisie jon pažadaŭ «ziamli škłavataj» Tatarskamu, jaki zahinuŭ u krasaviku 2023 hoda ŭ Pieciarburhu padčas tvorčaj viečaryny — u jaho ŭ rukach vybuchnuła statuetka, pieradadzienaja Darjaj Trepavaj.
Abvinavačańnie prasiła pryhavaryć Šyršykava da šaści hadoŭ. Aproč termina, Jarasłavu Šyršykavu zabaranili na praciahu dvuch hadoŭ administravać sajty. Pad vartu jaho ŭziali ŭ zale suda.
Šyršykaŭ pryznaŭ vinu, adnak jahony abaronca Fiodar Akčarmyšaŭ śćviardžaŭ u sudzie, što vina jahonaha padabaronnaha nie była dakazanaja. Akčarmyšaŭ pakazvaŭ na toje, što dopis Šyršykava byŭ apublikavany da taho, jak Śledčy kamitet kvalifikavaŭ zabojstva Tatarskaha jak terakt.
Abarona źbirajecca abskardžvać rašeńnie suda
Jarasłaŭ Šyršykaŭ adnym ź pieršych paviedamiŭ ab źniknieńni žurnalista The Wall Street Journal Evana Hierškoviča ŭ sakaviku 2023 hoda. Nieŭzabavie stała viadoma, što žurnalista aryštavali pa padazreńni ŭ špijanažy. Pa słovach Šyršykava, Hierškovič braŭ u jaho intervju, padčas jakoha pytaŭsia pra zasnavalnika PVK «Vahnier» Jaŭhiena Pryhožyna i adnosinach žycharoŭ Urała da ŭvarvańnia va Ukrainu.
Čytajcie taksama:
U Sankt-Pieciarburhu žančynu asudzili na 10 hadoŭ za padpał vajenkamata
U Rasii pa abvinavačańni ŭ dziaržaŭnaj zdradzie ŭpieršyniu asudzili školnika
