Infarmacyja ab źmianieńni pazicyi Biełarusi na pieramovach z Rasijaj ab pastaŭkach nafty, raspaŭsiudžanaja niekatorymi ŚMI, nie adpaviadaje sapraŭdnaści,
zajaviŭ pres‑sakratar biełaruskaha premjer‑ministra Alaksandr Cimašenka.
Pra toje, što «Biełaruś prymie rasijskija ŭmovy pastaŭki nafty ŭ vypadku pavieličeńnia Rasijaj kvoty pastaŭki nafty dla ŭnutranych patreb Biełarusi ŭ 2010 hodzie z 6 młn. da 8—9 młn. ton», 14 studzienia paviedamiła, u pryvatnaści, ahienctva PRAJM‑TASS.
«Infarmacyja pra toje, što «Biełaruś nie budzie nastojvać
na mižbiudžetnym raźmierkavańni ekspartnych pošlin, kali Rasija pavialičyć kvotu pastavak nafty dla ŭnutranych patreb Biełarusi z prapanavanych joj zaraz 6 młn. ton da 8—9 młn. ton «,
nie adpaviadaje sapraŭdnaści»,— skazaŭ pres‑sakratar premjer‑ministra.
«Takuju infarmacyju moh raspaŭsiudzić tolki čałaviek, vielmi daloki ad hetych pieramoŭ, jaki maje vielmi addalenaje ŭjaŭleńnie ab pazicyi biełaruskaha boku», — havorycca ŭ kamientaryi Cimašenki.
Jon padkreśliŭ, što biełaruskaja pazicyja pa pytańniach pastaŭki nafty vykładziena ŭ liście Alaksandra Łukašenki, nakiravanym Dźmitryju Miadźviedzievu.
Hetaja pazicyja, zaŭvažyŭ Cimašenka, «nie maje ničoha ahulnaha z pazicyjaj, ahučanaj niejkaj krynicaj u orhanach dziaržkiravańnia», na jakuju spasyłalisia ŚMI.
U liście Łukašenki, nahadajem, havaryłasia: 10 śniežnia 2009 hoda ŭ chodzie pasiadžeńnia Vyšejšaha dziaržsavieta Sajuznaj dziaržavy Biełarusi i Rasii prezidentami dźviuch krain była dasiahnuta damoŭlenaść, što na praciahu dvuch‑troch miesiacaŭ 2010 hoda nafta budzie pastaŭlacca ŭ Biełaruś biaspošlinna, i za hety čas baki ŭzhodniać umovy dalejšaj pastaŭki nafty. Adnak potym Rasijskaja Fiederacyja faktyčna admoviłasia ad vypracavanych damoŭlenaściej i vyłučyła nieprymalnyja dla Biełarusi ŭmovy».
Apošni raund pieramoŭ pa pastaŭkach nafty adbyŭsia ŭ Maskvie 9 studzienia. Paśla viartańnia biełaruskaj delehacyi ŭ Minsk pres‑słužba Savieta ministraŭ Biełarusi paviedamiła, što «biełaruski bok vystaviŭ svaje arhumienty na asnovie pravavoj bazy dvuchbakovych adnosinaŭ, padmacavaŭšy raźlikami, raniej uzhodnienymi ekśpiertami, adnak pieramoŭščyki z boku Rasii nie ŭziali heta pad uvahu».
Data adnaŭleńnia pieramoŭ pakul nieviadomaja.
