Namieśnik ministra achovy zdaroŭja — hałoŭny sanitarny lekar Biełarusi Valancina Kačan 15 studzienia na pres‑kanfierencyi ŭ Minsku raskazała, jak Minzdaroŭja rychtujecca da novaj chvali hrypu.
«Miarkujecca, što novaja chvala hrypu pryjdzie ŭ Biełaruś u kancy studzienia — pačatku lutaha», ‑‑ zaznačyła spadarynia Kačan.
Hałoŭny sanitarny lekar zapeŭnivaje, što ŭ krainie nazapašana dastatkova lekaŭ, kab pieražyć novy rost zachvorvańniaŭ na VRVI i hryp.
«Novaja chvala budzie słabiejšaja, čym pieršaja», - upeŭniena sp-nia Kačan. Nahadajem, što pieršaja chvala pačałasia 26 kastryčnika i praciahvałasia da 29 listapada 2009 hoda, padčas jaje na VRVI i hryp pierachvareli bolš za miljon čałaviek.
Sp‑nia Kačan padkreśliła, što ŭ bolšaści zachvarełych prysutničaŭ u lohkaj formie virus śvinoha (mieksikanskaha) hrypu. Hałoŭny sanitarny lekar miarkuje, što ciapier nie budzie takoj vialikaj kolkaści zachvarełych. «Usio budzie dobra», - ličyć jana.
Valancina Kačan dała niekalki rekamiendacyj, jak abaranić siabie i svaich blizkich ad hrypu:
bolš hulać na śviežym pavietry, bo soniečnaje maroznaje nadvorje spryjaje aktyŭnamu adpačynku, siłkavać arhanizm vitaminnymi kompleksami, vieści zdarovy ład žyćcia, čarhavać pracu z adpačynkam, vysypacca i pravilna charčavacca. A kali zachvareli, to abaviazkova źviartacca da doktara, a nie chadzić «pa‑hierojsku» na pracu.
***
Štohod pa statystycy ŭ Respublicy Biełaruś rehistrujecca kala 2,5 młn vypadkaŭ vostrych reśpiratornych infiekcyjnych zachvorvańniaŭ.
U 2009 hodzie, u paraŭnańni z 2008 hodam naziraŭsia rost infiekcyjami vostrymi reśpiratornymi infiekcyjami na 34,5%, i ŭsiaho za 11 miesiacaŭ 2009 hoda zarehistravana 3 693 889 vypadkaŭ VRZ. Pakazčyk zachvorvańniaŭ skłaŭ 38.412 vypadkaŭ na 100 tysiač nasielnictva. Z ahulnaja liku hrypu - 531.588 vypadkaŭ, što ŭ 2,2 razy vyšej anałahičnaha pieryjadu 2008 hoda, i ŭ 1,9 razy mienš čym 1999 hodzie, kali byŭ pik zachvorvańniaŭ na hryp.
