Šaści nastaŭnikam ź Minskaj vobłaści pahražajuć zvalnieńniami za palityku.
Taisa Danilevič.
Aleś Jaźvinski.
15 studzienia zahadčyca ŭpraŭleńnia adukacyi Minabłyvykankamu Taisa Danilevič prymała ŭ siabie nastaŭnikaŭ, jakija źjaŭlajucca siabrami apazicyjnych palityčnych partyj.
«Ranicaj u piatnicu mianie raptoŭna vyklikali da načalnika adździeła adukacyi rajona, — kaža nastaŭnik fizkultury ź Niaśviža, siabar KCHP‑BNF Aleś Jaźvinski. — Na słužbovaj mašynie pavieźli ŭ Minsk. Nas tam było šeść čałaviek.
Danilevič pa adnym vyklikała da siabie ŭ kabiniet. Chacia jana razmaŭlaje takim tonam, što dobra było čuvać, što havaryłasia astatnim».
Spadar Jaźvinski kaža, što jamu było prapanavana napisać zajavu ab vychadzie z partyi, u advarotnym vypadku pahražali zvalnieńniem. «Spn.Danilevič sa mnoj razmaŭlać navat nie chacieła, źviartałasia tolki da načalnika RANA. Jašče jaje aburyŭ bieł‑čyrvona‑bieły značok, što byŭ u mianie na pinžaku».
Takija samyja ŭmovy byli vysunutyja nastaŭnicy historyi z Puchaviččyny Natalli Iljinič, nastaŭniku anhielskaj movy z Łahojščyny Mikołu Laščunu, nastaŭniku hieahrafii ź Niaśvižčyny Uładzimiru Parejku, nastaŭniku fizkultury ź Vilejki Siarhieju Klimionku, nastaŭnicy‑defiektołahu ź Lubani Nadziei Ahafonavaj.
Aleś Jaźvinski kaža, što vychodzić z partyi nie źbirajecca, bo ŭ joj ad momantu zasnavańnia. «Jak ja dzieciam vykładać budu, kali zaraz admoŭlusia ad siabroŭstva ŭ KCHP‑BNF? Na ŭrokach ja nie viadu prapahandu, ale vuču dziaciej patryjatyzmu», — kaža A.Jaźvinski.
A voś Mikoła Laščun i Nadzieja Ahafonava byli vymušanyja napisać zajavy ab vychadzie z partyj BNF i AHP adpaviedna.
Natalla Iljinič ža napisała skarhu ŭ prakuraturu — kantrakt ź joj byŭ padoŭžany 12 studzienia.
Svaimi dziejańniami ŭpraŭleńnie adukacyi parušaje kanstytucyjnaje prava hramadzian być siabrami palityčnych partyj i arhanizacyj. A hałoŭnaje — jaki cynizm, aburajucca nastaŭniki. U BRSM, «Biełuju Ruś» zahaniajuć, jašče i hrošy dziaruć na padkormku funkcyjanieraŭ, z astatnich — vyhaniajuć. I heta nazyvajuć «samaj demakratyčnaj sistemaj u śviecie».