Andrej Pačobut razmaŭlaje pa telefonie pierad pačatkam pasiedžańnia.
Fota Julii Daraškievič, «Naša Niva».
U Kastryčnickim rajonnym sudzie Horadni zakončyŭsia razhlad administracyjnaj spravy dvuch aktyvistaŭ nie pryznavanaha ŭładami Sajuzu palakaŭ. Ich abvinavačvali ŭ tym, što jany pieraškadžali pracavać zdymačnaj hrupie abłasnoha telebačańnia, jakaja rabiła siužet pra ŭšanavańnie pamiaci polskich žaŭnieraŭ na vajskovych mohiłkach. Heta – artykuł 156 administracyjnaha kodeksu, što datyčyć drobnaha chulihanstva. Andreja Pačobuta pakarali aryštam, a adnosna Miečysłava Jaskieviča sprava spyniena.
U sudzie mnie ŭdałosia krychu parazmaŭlać z Andrejem Pačobutam. Nahadaju, što ich ź Miečysłavam Jaskievičam zatrymali 18 žniŭnia i ŭvieś čas jany znachodzilisia ŭ milicejskim izalatary. Andrej Pačobut:
(Pačobut:) «Apošnija sutki nas trymali na padstavie piśmovaha ŭkazańnia načalnika Kastryčnickaha RAUS Bieda. Nas pavinny byli zvolnić, i rašeńnie musiła prymać ŭžo sudździa, bo dakumenty pieradali ź milicyi na razhlad u sud. Adnak sudździa takoha rašeńnia nie pryniała. Kala troch hadzinaŭ supracoŭniki milicyi vyrašali nakont nas, mianie čatyry razy zavodzili ŭ izalatar časovaha ŭtrymańnia i čatyry razy nas admaŭlalisia brać, tamu što nie było padstaŭ».
Andrej Pačobut ličyć, što pavodle zakonu sudździa pavinna była ŭčora ich vypuścić z pozvaj, kab jany siońnia pryjšli na praciah sudovaha razboru.
Sudździa Zinaida Barcevič apytała niekalkich śviedkaŭ, u tym liku Anžaliku Borys – staršyniu Sajuzu palakaŭ, nie pryznavanaha ŭładami. Jana, u pryvatnaści, skazała, što im nie było jasna – chto ich zdymaje, i što ichnija mierapryjemstvy časta filmujuć nieviadomyja ludzi, jakija nikoli nie pradstaŭlajucca. Inšyja śviedki patłumačyli, što 15 žniŭnia na haradzienskich vajskovych mohiłkach malilisia razam z ksiandzom za žaŭnieraŭ Vojska Polskaha i nie chacieli, kab ich zdymali. Jany admaŭlali, što Pačobut i Jaskievič pa-chulihansku pieraškadžali zdymačnaj hrupie abłasnoha telebačańnia.
Na sudovym pasiedžańni byli redaktar telebačańnia Uładzimir Łoban i aperatar Andrej Bialatka. Jany admovilisia vykazać svajo mierkavańnie dla našaha Radyjo. Adzinaje, što spadar Łoban skazaŭ, što jany nie zmahli zrabić siužet pra ŭšanavańnie pamiaci polskich žaŭnieraŭ, i jon musiŭ pisać z hetaj nahody tłumačeńnie dla svajho kiraŭnictva. Nahadaju, što milicyjanty skłali pratakoł adnosna Pačobuta i Jaskieviča na padstavie zajavy namieśnicy kiraŭnika abłasnoha teleradyjoabjadnańnia Aleny Prymačenki.
