Pavodle apytańnia, praviedzienaha studentami‑aktyvistami ŭ Biełaruskim dziaržaŭnym piedahahičnym univiersitecie, kraina maje tvar Francyska Skaryny.
Studenty‑aktyvisty vyrašyli ŭziać prykład z ukrainskich i rasijskich arhanizataraŭ konkursu «Imia krainy» i pravieści apytańnie ŭ studenckim asiarodździ na temu: «Kaho možna ličyć tvaram Biełarusi?» Svaje mierkavańni vykazali kala tysiačy čałaviek. Arhanizatarami prajekta byŭ stvorany śpis ź imionaŭ 50 najbolš viadomych ludziej Biełarusi roznych časoŭ i nakirunkaŭ dziejnaści.
Pobač stali Jeŭfrasińnia Połackaja i Simiaon Połacki, Tadevuš Kaściuška i Alaksandr Miaśnikoŭ, Maksim Bahdanovič i Alaksandr Hleb, a taksama Kastuś Kalinoŭski, Michał Vituška, Zianon Paźniak… śpis pačesna zaviaršyła imia kiraŭnika krainy. Moładź pavinna była vybrać samaha hodnaha biełarusa.
Dziasiatka lideraŭ vyhladaje tak:
Francysk Skaryna (15%); Jeŭfrasińnia Połackaja (12%); Vasil Bykaŭ (10%).
Dalej iduć Vitaŭt Vialiki (7%) i Kastuś Kalinoŭski(6%). Alaksandr Łukašenka adstaŭ ad načalnika paŭstańnia 1863 h. na 1%, pakinuŭšy za saboj Jakuba Kołasa (5%) i Janku Kupału (4%). Usiaho 2% hałasoŭ atrymaŭ Usiasłaŭ Čaradziej, a 1% — … Alaksandr Hleb (!).
Z vyšejnazvanaha śpisu vynikaje, što ŭ Biełarusi mužčynski tvar pieršadrukara. Adnak astatnija vyniki apytańnia navodziać na dumki nie vielmi stanoŭčaha kštałtu.
Nivodnaha hołasu nie atrymali Uładzisłaŭ Syrakomla i Stanisłaŭ Šuškievič. Zianona Paźniaka paznačyli try čałavieki. Łarysa Hienijuš nabrała mienš, čym Alaksandr Miaśnikoŭ, a Piatro Mašeraŭ pieraplunuŭ pa kolkaści nabranych hałasoŭ usich dziejačaŭ BNR razam uziatych.
Pra mnohich dziejačaŭ udzielniki apytańnia prosta nie čuli. Moža być, u svaim viedańni historyi studenty vyšejšych navučalnych ustanoŭ iduć dalej kursa «Maja Radzima — Biełaruś»? A sučasnyja hieroi tyja, čyje imiony možna kožny dzień pačuć pa telebačańni abo pračytać u haziecie?
