2010 hod — adzin z tych, kali pravasłaŭnyja i katoliki buduć śviatkavać Vialikdzień razam. Sioleta hetaja ŭračystaść prypadaje na 4 krasavika.
U hety dzień hučnym zvonam z usich cerkvaŭ i kaściołaŭ śvietu budzie abvieščana vialikaja radaść — Chrystos Uvaskros!
Časta paŭstaje pytańnie, čamu katoliki i pravasłaŭnyja ŭ našaj krainie zvyčajna adznačajuć Paschu ź vialikaj roźnicaj dzion
i tolki raz na niejki čas data ŭračystaści supadaje.
Sprava ŭ tym, što Vialikdzień — heta ruchomaje śviata. Jaho data nieadnojčy ŭ historyi była temaj sprečak. U našy časy ŭ zachodnich Kaściołach pryniata, što Vialikdzień adznačajecca ŭ niadzielu paśla pieršaj viasieńniaj poŭni miesiaca. Data ŭračystaści Uvaskrasieńnia Chrysta zaležyć taksama ad daty Ukryžavańnia, jakoje, jak pišuć Jevanhielisty, adbyłosia na try dni raniej — niepasredna pierad jaŭrejskaj Paschaj, jakaja adznačałasia ŭ čatyrnaccaty dzień miesiaca Nisan. Adnak prablema zaklučajecca ŭ tym, što data Ukryžavańnia ŭ Jevanhielli pavodle Jana i ŭ inšych troch adroźnivajecca. Tamu ŭschodnija Kaścioły vykazvalisia za datu čatyrnaccaty Nisan, a zachodnija pryviazvali adznačeńnie ŭračystaści Uvaskrasieńnia da piatnaccataha dnia hetaha miesiaca.
Pierałom u vyznačeńni dnia Paschi ździejśniŭ manach pa imieni Dyjanizij. Jon stvaryŭ chryścijanski kalandar, pačynajučy adlik ad Naradžeńnia Chrysta.
Kab atrymać datu Vialikadnia,
siaredniaviečny chranołah šukaŭ tak zvanuju załatuju ličbu, źviaraŭ pa tablicy datu poŭni miesiaca,
potym šukaŭ pieršuju poŭniu paśla 21 sakavika i zatym ŭ tablicy tak zvanych litar niadzieli adšukvaŭ datu Vialikadnia.
Paśla reformy kalendara šlachi Uschodu i Zachadu, što datyčać adznačeńnia Paschi, razyšlisia. Roźnica ŭ śviatkavańni Vialikadnia pamiž Katalickim Kaściołam i tymi Pravasłaŭnymi Cerkvami, jakija karystajucca Julijanskim kalendarom,
moža składać navat piać tydniaŭ. Ale moža i supadać, jak adbyvajecca i sioleta.
Źjaŭlajucca tendencyi, kab uvieści stałuju datu Vialikadnia. Varta adznačyć, što Kanstytucyja ab Śviatoj Liturhii Druhoha Vatykanskaha Saboru całkam dapuskaje takuju mahčymaść.
