Stralać z aŭtamata Kałašnikava ŭ Maładziečnie pryjšłosia 26-hadovamu staršynu milicyi adździeła Departamienta achovy Jaŭhienu Mišurko, kab spynić pjanaha vadziciela aŭtamabila «Folksvahien-Holf».
Fota Dźmityja Stasiuleviča, «Rehijanalnaja hazieta»
Milicyjanier-kinołah Jaŭhien Mišurko raskazaŭ u intervju «RH»: razam ź milicyjanieram-vadzicielem Aleham Turovičam jany na patrulnaj mašynie ruchalisia pa vulicy Partyzanskaj u bok Hramadoŭskaj. Na pierakryžavańni ŭbačyli «Folksvahien-Holf», jaki jechaŭ ad bardziura da bardziura, pieryjadyčna vyjazdžajučy na pałasu sustrečnaha ruchu.
Paviarnuli na vulicu Bujnickaha. Kala 23 hadzin 40 chvilin supracoŭniki adździeła Departamienta achovy ŭklučyli sirenu i pa rupary zapatrabavali vadzicielu spynicca. Kiroŭca nie padparadkavaŭsia i pačaŭ uciakać. Jaŭhien Mišurko raskazvaje, što šafior parušaŭ praviły darožnaha ruchu, prajazdžaŭ na čyrvonaje śviatło śviatłafora. Potym paviarnuŭ na Vialiki Haściniec i pajechaŭ u bok Nasiłava.
Milicyjaniery praśledavali «Folksvahien», jaki stvaraŭ realnuju pahrozu inšamu transpartu i piešachodam. Vyjechali z horada, prajechali Nasiłava i Damašy. Parušalnik praciahvaŭ ihnaravać patrabavańni spynicca. Na padjeździe da Lebiedzieva Jaŭhien pryniaŭ rašeńnie prymianić tabielnuju zbroju. Z aŭtamata Kałašnikava jon spačatku zrabiŭ try papieradžalnyja vystrały ŭ pavietra, paśla - dva prycelnyja vystrały pa kołach aŭtamabila.
Kuli prabili koły, «Folksvahien» spyniŭsia. U mašynie, akramia vadziciela, byli pasažyry - dva chłopcy i dźvie dziaŭčyny. Padčas zatrymańnia supraciŭleńnia jany nie akazvali. Pa słovach Jaŭhiena, maładyja ludzi ź ciažkaściu razumieli, što adbyvajecca ŭvohule.
Jaŭhien Mišurko i Aleh Turovič vyklikali rabotnikaŭ dziaržaŭtainśpiekcyi. Bližejšaja mašyna DAI znachodziłasia ŭ vioscy Chažova. Inśpiektar darožna-pastavoj słužby Dźmitry Stasiulevič paviedamiŭ «RH»: za rulom «Folksvahiena» byŭ pjany 29-hadovy žychar Smarhoni, jaki nie maje pravoŭ kiravańnia.
Ciapier na jaho składzienyja pratakoły pa dvuch artykułach Kodeksa ab administracyjnych pravaparušeńniach. Jaho abvinavačvajuć u kiravańni aŭtamabilem biez pravoŭ u stanie ałkaholnaha apjanieńnia, a taksama ŭ nieadnarazovym nievykanańni patrabavańniaŭ rabotnikaŭ milicyi spynicca.
Namieśnik načalnika Maładziečanskaha adździeła Departamienta achovy Uładzimir Vasilkoŭ raskazaŭ karespandentu «RH»:
— Kali paśla składańnia pratakołaŭ pjanaha vadziciela, jaki pavodziŭ siabie raźviazna, adpuskali, ja spytaŭ u jaho: nu, što, adrenalinu zachaciełasia?