Viečaram 16 sakavika ŭ minskaj siadzibie «Tavarystva biełaruskaj movy imia Franciška Skaryny» adbyłasia prezientacyja knihi litaraturaznaŭcy Uładzimira Sodala «Błasłavionyja Kušlany».
Ilustravanaje litaraturna‑krajaznaŭčaje vydańnie na 144 staronkach vyjšła ŭ staličnym vydaviectvie «Knihazbor» i pryśviečana 170‑hodździu z dnia naradžeńnia biełaruskaha paeta, prazaika, publicysta i pierakładčyka Franciška Bahuševiča,
jakoje budzie adznačacca 21 sakavika.
Sodal apisvaje słavutaści kolišniaha falvarka Kušlany Smarhonskaha rajona Hrodzienskaj vobłaści i adrasuje knihu tym prychilnikam biełaruščyny, jakija źbirajucca naviedać Kušlany.
Uładzimir Sodal ličyć Bahuševiča litarataram suśvietnaha maštabu — jak Taras Šaŭčenka dla Ukrainy. «Inšaja reč, što Biełaruś nie adno stahodździe žyła ŭ paniaviercy, pryhniečanaja i niepryznanaja. Adsiul i taki słaby vodhałas u śviecie pra jaje lepšych synoŭ», — adznačyŭ jon.
Pavodle słoŭ litaraturaznaŭcy, Bahuševič z pavahaŭ staviŭsia da vialikich aśvietnikaŭ čechaŭ, bałharaŭ i sierbaŭ, skiroŭvaŭ svoj pozirk da ŭschodniaj mudraści, ab čym śviedčyć jaho pierakład kitajskaj bajki «Śvińni i varany», jamu naležać šmatlikija fiłasofskija kryłatyja vysłoŭi, kštałtu «kab usia ziamielka adnu praŭdu mieła», «a biez taho słova ja niamy‑kaleka, choć by zaniamieć mnie i da kanca vieka».
«Pryvablivała Bahuševiča i postać suhučnaha jamu francuzskaha paeta Pjera Bieranže», — skazaŭ Sodal.
Na jaho dumku, tvorčaść Bahuševiča nie straciła svajoj nadzionnaści i siońnia,
ab čym śviedčyć źmiest jaho mnohich vieršaŭ, u tym liku «Praŭda» i «Jak praŭdy šukajuć». Zaraz Sodal pracuje nad čarhovaj knihaj «Daślednickija detektyvy», u jakoj šmat miesca pryśviačajecca žyćciu i dziejnaści Bahuševiča.
Razam sa svajoj siamjoj Bahuševič udzielničaŭ u nacyjanalna‑vyzvalenčym paŭstańni 1863—64 hadoŭ i byŭ paranieny ŭ bajach u Aŭhustoŭskich lasach. Jak adznačyŭ daśledčyk, Bahuševič — revalucyjny demakrat, adzin z pačynalnikaŭ krytyčnaha realizmu ŭ biełaruskaj litaratury, budziciel histaryčnaj i nacyjanalnaj śviadomaści biełarusaŭ.
Zaraz imia Bahuševiča nosić płošča ŭ Minsku i Ašmianski krajaznaŭčy muziej. Stvorany Litaraturna‑miemaryjalny muziej‑siadziba Franciška Bahuševiča ŭ Kušlanach. Pomniki paetu ŭstalavanyja ŭ Smarhoni, Župranach (Ašmianski rajon Hrodzienskaj vobłaści) i na jaho mahile ŭ hetym miastečku.
