Kiraŭnik Rady biaśpieki Biełarusi Viktar Šejman pastanaviŭ pravieryć biełaruski aŭtabiznes. Mienavita jamu, adnamu z najbližejšych da prezydenta ludziej, napeŭna, daručyli vyjaśnić, jakim čynam Biełaruś za 7 miesiacaŭ patrapiła pavialičyć impart samachodaŭ u krainu bolš jak na 100 młn dalaraŭ.
Taki rost duža niepakoić urad, bo peŭnym čynam zaminaje vykanańnie prahnoznych pakaźnikaŭ na hety hod i pieradusim nie spryjaje pamianšeńniu admoŭnaha salda zamiežnaha handlu Biełarusi. Pra hetuju zakłapočanaść 5 vieraśnia zhadała zastupnica ministra ekanomiki Biełarusi Taciana Stračanka, zaciemiŭšy, što va ŭradzie razumiejuć pryčyny hetkaha rostu i nijakich zachadaŭ rabić nie planujuć. Adnak śled pravieryć, i Šejman pačaŭ dziejničać.
6 vieraśnia bližej da paŭdnia na aŭtadyleraŭ syšła navała praviaralščykaŭ. Jak paviedamlaje nadziejnaja krynica, pad pravierku trapili takija aŭtadylery, jak «Jukoła», «Atlant-M», aŭtadrom «Enerhija» i kolki inšych. Aperacyja pa vyjaśnieńni sytuacyi na rynku svaimi maštabami ŭražvaje.
Praviaralščykaŭ pasadzili pa aŭtobusach i pavieźli na vyšej zhadanyja pradpryjemstvy. Voś ža, pałova ź ich nia viedała, kudy ich viazuć (kab nia zdaryłasia ŭciečka infarmacyi). Zahadu svajho kiraŭniki pravierki nie pakazvajuć, bo «heta źjaŭlajecca sakretnym dakumentam». Pravierku, inicyjavanuju na asabistaje ŭkazańnie Šejmana, ačolvaje Słužba biaśpieki prezydenta, – paviedamlaje krynica.
Pavodle jahonych źviestak, da hrupaŭ praviaralščykaŭ, akrom Słužby biaśpieki prezydenta, byli dałučanyja pradstaŭniki Prakuratury, ABEZ, padatkovaj palicyi, Kamitetu dziaržkantrolu, Kamitetu cenaŭtvareńnia i h.d.
Ahułam vyjšła kala 10 orhanaŭ kantrolu. Navat pryciahvajucca admysłoŭcy ź nie kantralujučych orhanaŭ, – zaznačyła krynica, paviedamiŭšy, što pravierka maje doŭžycca da 15 kastryčnika 2006 h.
Krynica padkreślivaje, što staviłasia zadača «znajści choć što-niebudź».
«Praviaralščyki ŭsio apiačatvajuć. Zazirajuć u kožnuju śmietnicu», – paviedamlaje krynica.
Skažam, usio duža nahadvaje teoryju zmovy i padajecca niepraŭdapadobna. Ale ž u aŭtamabilnym chołdynhu «Atlant-M» paćvierdzili fakt pačatku pravierki.
«Tak, sapraŭdy, u nas učora pačałasia pravierka», – paćvierdziŭ pamočnik hieneralnaha dyrektara Illa Procharaŭ, adnak nie prakamentavaŭ taho faktu.
«Ničoha zvyšnaturalnaha nie adbyvajecca, – miarkuje Procharaŭ, zaznačyŭšy: – nam niama čaho chavać. Adździaleńni chołdynhu «Atlant-M» pracujuć u zvyčajnym režymie».
Infarmacyju ab tym, što ŭ hrupy pravierki ŭvachodziać admysłoŭcy z roznych viedamstvaŭ, paćvierdzili ŭ SP TAA «Jukoła-Servis».
«Nas paviedamili, što heta planavaja pravierka, ale nie pa planie padatkovych orhanaŭ. Kompleksnaja, mnoha admysłoŭcaŭ. Maje doŭžycca jak najmieniej da kanca miesiaca», – patłumačyła hałoŭnaja buchhaltarka Jukoły.
Fakt pravierki paćvierdzili hetaksama ŭ TAA «Aŭtamabilny dom Enerhija Hmbch». Adnak dyrektar Siarhiej Daniłovič admoviŭsia što-kolviek kazać na hetuju temu.
«Ničoha paćviardžać i źniapraŭdžvać ja nia budu. No comment», – padsumavaŭ karotkuju hutarku sp.Daniłovič.
I praŭda, šče rana rabić vysnovy i kamentary. Pa niejkim časie budzie viadoma, ci kiraŭnik Rady biaśpieki vyjaśniaŭ isnavańnie zakonnych mažlivaściaŭ pavieličeńnia impartu na takuju sumu, ci vyvučaŭ perspektyvy biznesu na pradmiet mažlivaj prychvatyzacyi čarhovaha łasaha kavałka.
