Admietnaściu sioletnaha mižnarodnaha teatralnaha festyvalu «Biełaja Vieža» źjaŭlajecca adsutnaść spektaklaŭ na biełaruskaj movie.
Zaprošanyja sioleta ŭ Bieraście pieravažna rasiejskamoŭnyja teatralnyja kalektyvy. Aproč rasiejskamoŭnych tvoraŭ, u konkursnaj prahramie dramatyčnyja teatry pakažuć spektakli na polskaj, słavackaj, persydzkaj, tureckaj movach.
Ministerstva kultury Biełarusi ŭžo niekalki hadoŭ zapar nie znachodzić srodkaŭ na praviadzieńnie festyvalu. Sioleta ŭ finansavańni ŭdzielničaje Pastajanny kamitet «Sajuznaj dziaržavy Rasiei j Biełarusi».
Adpaviedny j deviz, pad jakim adbyvajecca festyval.
Viadomy biełaruski dramaturh Siarhiej Kavaloŭ:
Kavaloŭ: Festyval prachodzić pad devizam "Rasiejskaja kultura ŭ krainach byłoha SSSR". Hety festyval pryśviečany rasiejskaj kultury. Moža tamu j niama spektaklaŭ na biełaruskaj movie. Chacia rasiejskaja klasyka jość i pa-biełarusku. Festyval «Biełaja Vieža» samy bujny, ale jość jašče festyvali. U Mahilovie moładzievy mižnarodny festyval - sioleta adbudziecca druhi raz. Festyval u Homieli nazyvajecca "Słavianskija sustrečy". A ŭ kancy vieraśnia ŭ Maładečnie budzie mižnarodny festyval monaspektaklaŭ. U Polščy ŭ kožnym horadzie jość svoj festyval, a ŭ niekatorych pa niekalki. U Lublinie - dva festyvali. Na «Biełuju Viežu» traplaje bolš klasyka, eksperymenty režyserskija. Prablema movy vidavočnaja i dla teatraŭ, i dla dramaturhaŭ. Usio mienš dramaturhaŭ piša pa-biełarusku. Zaraz arhanizujucca čytańni biełaruskaj dramaturhii ŭ Lublinie pry festyvali «Kanfrantacyja». Arhanizatary mieli kłopat. A ŭ zborniku biełaruskaj sučasnaj dramaturhii, jaki vychodzić u Varšavie, usie teksty - pierakłady z rasiejskaj. Vidavočnaja tendencyja pierachodu na rasiejskuju movu. Hetaha nie było jašče hadoŭ 10 nazad, było, napeŭna, paroŭnu.
U 11 Mižnarodnym festyvali „Biełaja Vieža» prymaje ŭdzieł 21 dziaržava. Aproč susiednich krainaŭ, Belhija, Hiermanija, Turcyja, Izrail, Iran, Paŭdniovaja Kareja. Budzie pradstaŭleny navat sumiesny arhientynska-balivijski prajekt. Za tydzień planujecca pakazać 25 dramatyčnych i 24 lalečnyja spektakli.
